ԱՄՆ նախագահ Բարաք Օբամայի նախընտրական շտաբը ընդունել է սպանված ահաբեկիչ Ուսամա բեն Լադենի անունից կատարված նվիրատվությունը՝ գրում է WorldNetDaily (WND) ամերիկյան պահպանողական հրատարակությունը:
Իրականում գումարը պակիստանյան սերվերից ուղարկել են WND կայքի լրագրողները՝ ապացուցելու, որ Օբաման նվիրատվություն է ստանում արտասահմանից, թեև դա օրենքով արգելված է:
WND-ի աշխատակիցներին հաջողվել է երկու անգամ փոքր գումար փոխանցել Օբամայի շտաբ: Առաջին անգամ նրանք հոկտեմբերի 26-ին 15 դոլար են ուղարկել ՝ օգտագործելով պակիստանյան IP-հասցեն և պրոքսի-սերվերը: Անկետան նրանք լրացրել են ահաբեկչի անունից, որին ամերիկյան հատուկ ծառայությունները սպանել էին 2011-ի մայիսին: Որպես հասցե նրանք նշել էին. նահանգ՝ Կալիֆոռնիա, քաղաք՝ Աբոտաբատ (Պակիստանի այդ քաղաքում է սպանվել բեն Լադենը), փոստային ինդեքսը՝ 91101 (լրագրողները օգտագործել են 2001-ի սեպտեմբերի 11-ի ահաբեկչության ամսաթիվը): Նման ինդեքս իսկապես գոյություն ունի, սակայն Կալիֆոռնիայի Փասադենա քաղաքինն է:
Որպես աշխատավայր լրագրողները նշել են «Ալ-Քաիդա»-ն, էլփոստի վանդակում նշել են իրենց բացած [email protected] հասցեն:
Հաջորդ օրը լրագրողները կրկնել են փորձը՝ համոզվելու համար, որ սխալմունք չի եղել: Նրանք ևս 5 դոլար են ուղարկել: Բանկում հաստատել են, որ երկու դեպքում էլ գումարները դուրս են գրվել հաշվից:
Հրատարակության եզրակացմամբ` Օբամայի կայքը ի վիճակի չէ հետևելու, թե որտեղից են ստացվում նվիրատվությունները: Լրագրողները հայտարարել են, որ Օբամային ապօրինի նվիրատվությունների մասին հայտարարություն են պատրաստում Դաշնային ընտրական հանձնաժողովի և FBI-ի համար:
