«Այսօր կարևոր չէ, թե ԲՀԿ-ն որ դաշտում է, կարևորն այն է, թե ումից է ձայներ կորզելու: Նրա պաքարի թիրախը ոչ թե Հանրապետականն է, այլ մյուս չորս-հինգ ընդդիմադիր խմբավորումները: ԲՀԿ-ի թիրախն ընդդիմադիր ձայներն են»,- այսօր լրագորղների հետ հանդիպման ժամանակ այս մասին ասաց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը:
Նա նշեց, որ ՀՅԴ-ն արդեն կարծես թե հայտարարում է, որ չի մասնակցելու նախագահական ընտրություններին, ուստի հարց է ծագում՝ ո՞ւմ կծառայի կամ, եթե ոչ մի կոչ չանի, ո՞ւմ կարող է ՀՅԴ-ն տալ իր ձայները: «ՀՅԴ-ի ձայները կանցնեն «Ժառանգությանը», մասամբ՝ ԲՀԿ-ին, շատ փոքր՝ Սերժ Սարգսյանին, ՀԱԿ-ին կարող է ոչինչ չանցնել, քանի որ ժամանակին հալածել է ՀՅԴ-ին՝ որպես քաղաքական ուժի»,- պարզաբանեց բանախոսը:
Ըստ նրա՝ այսօր պարզ է կարծես, որ իր թեկնածությունը կառաջադրի «Ժառանգություն» կուսակցության ղեկավար Րաֆֆի Հովհաննիսյանը, գործող նախագահ Սերժ Սարգսյանը, ՀԱԿ-ը կարող է ինչ-որ մեկին առաջադրել, և դաշտում մնում է ԲՀԿ-ի խնդիրը, որն առ այսօր չի որոշել:
«ԲՀԿ վարկանիշը Ծառուկյանի վարկանիշն է: Այսօր եղանակ է ստեղծում ԲՀԿ-ն: Մենք լսում ենք Հանրապետական կուսակցության կարկառուն դեմքերին, թե այլընտրանք չկա Սերժ Սարգսյանին, սակայն դա այդպես չէ: 96 թվականը թող օրինակ լինի մեզ համար: Այնպես որ, քաղաքական դաշտում կայուն ոչինչ չկա, ամեն ինչ սպասելի է՝ ղեկավարներն ավելի աչալուրջ և հաշվենկատ պետք է գործեն՝ հենվելով լուրջ հետազոտությունների վրա»,- մեկնաբանեց Ահարոն Ադիբեկյանը:
