Չինաստանի արևելյան Ֆուցզյան մարզում վարորդը միտումնավոր հարվածել է 19 մարդու, որից 6-ը զոհվել են, մնացածը՝ վնասվածքներ ստացել: Զոհերից 3-ը երեխաներ են: Ցինկոու քաղաքով շարժվող վարորդը հարվածել է անցորդներին ու հեծանվորդներին: Այս մասին հայտնում է ITAR-TASS-ը:
Ոստիկանության նախնական վարկածով՝ Լին ազգանունով հանցագործի գործողությունների պատճառը եղել է անհավասարակշիռ էմոցիոնալ վիճակը՝ ընտանեկան խնդիրների պատճառով:
Հայտնի է, որ Լինը սկսել է մեքենա վարել դատարանի շենքից, որտեղ քննվում էր ամուսնալուծության մասին նրա կնոջ հայցը: Հավաքելով մեծ արագություն՝ նա պարբերաբար մխրճվել է մայթին գտնվողների մեջ: Նա այդ կերպ ընթացել է մոտ 2 կմ՝ մինչ մեքենան դադարել է շարժվել, քանի որ վնասվել էր:
Դեպքի վայր ժամանած ոստիկանները չեն կարողացել նրան անմիջապես ձերբակալել, քանի որ նա սպառնացել է բենզինով հրկիզել մեքենայում գտնվողներին: Հանցագործի ուշադրությունը հաջողվել է շեղել, այնուհետև հրշեջները հատուկ միջոցներ են կիրառել կրակի դեմ պայքարի համար և կանխել մեքենայի հրկիզումը, որից հետո ոստիկանները ձերբակալել են վարորդին:
