Մի քանի տարի առաջ 19-ամյա բրիտանուհի Ռոզի Փելեյն արթնացել է հիվանդանոցում և հասկացել, որ բացարձակապես ոչինչ չի հիշում իր ապրած կյանքի մասին՝ հայտնում է Daily Mail-ը: Աղջիկը չի ճանաչել իր սիրելիին, իր հարազատներին:
Արդեն 3 տարի է՝ Ռոզի Փելեյը փորձում է մաս-մաս վերականգնել իր անցյալը, ինչը դժվարությամբ է ստացվում: Աղջիկը չի հիշում իր սիրելի խմբերին ու ուտեստները: Նա մոռացել է ձիով զբոսնելը: Նա իր մանկության լուսանկարներից ոչ ոքի չի ճանաչում:
2011-ի օգոստոսին Ռոզին զբոսնելիս է եղել իր ընկերոջ հետ, երբ հանկարծ ուշագնաց է եղել: Ուշքի գալով՝ աղջիկը կարողացել է տուն հասնել, բայց այնտեղ նորից է ուշաթափվել և ընկել աստիճաններից:
Բժիշկները Ռոզիի մոտ ախտորոշել են էնցեֆալիտ, որը զարգացել է սովորական հերպեսից:
«Չնայած ես մոռացել եմ իմ բոլոր հարազատներին և ընկերներին՝ ինձ համար հաճելի էր նրանց հետ նորից ծանոթանալ: Ես շատ եմ տխրում, որ կորցրել եմ հիշողությունս, բայց չեմ պատրաստվում հանձնվել»,- ասում է Ռոզին:
Աղջկան վաղուց դուրս են գրել հիվանդանոցից: Նա լի է վարսահարդարություն սովորելու վճռականությամբ: Նա ամեն օր տնից դուրս գալուց առաջ գրի է առնում օրվա ընթացքում իր անելիքները: Աղջկա խոսքով՝ իր ինքնազգացողությունն օրեցօր լավանում է:
