Ղրիմի և Լեռնային Ղարաբաղի միջև չի կարելի ոչ մի զուգահեռ անցկացնել՝ ադրբեջանական ANS հեռուստաալիքի եթերում հայտարարել է Ադրբեջանում Ռուսաստանի դեսպան Վլադիմիր Դորոխինը:
«Դա լիովին յուրահատուկ երևույթ է, զուգահեռներ չեն կարող տարվել: Լեռնային Ղարաբաղի հետ կապված գաղափարներն ու արտահայտություններն արհեստածին զուգահեռներ են: Լեռնային Ղարաբաղը լիովին այլ խնդիր է, այն ունի լուծման իր գործընթացը, և մենք մասնակցում ենք դրան»,- նշել է Դորոխինը:
«Գիտեք, ես կարող եմ նեղանալ հարցից՝ Ռուսաստանը ճանաչո՞ւմ է Ադրբեջանի տարածքային ամբողջականությունը, թե՞ ոչ: Որովհետև Ռուսաստանի և Ադրբեջանի միջևտորագրվել են շատ փաստաթղթեր, որոնցում մենք միջազգային մակարդակով ճանաչված սահմանների շրջանակներում ճանաչում ենք Ադրբեջանի տարածքային ամբողջականությունը: Այդ փաստաթղթերը ստորագրվել են նախագահների և արտաքին գործերի նախարարների կողմից, բայց նաև կան փաստաթղթեր, որոնք ընդունվել են առանց ստորագրելու»,- ասել է դիվանագետը:
Նրա խոսքով՝ դա այնքան ակնհայտ է, որ կրկնելու կարիք չունի:
«Բնականաբար, ես հասկանում եմ: Առաջին՝ ես չեմ նեղանա, որովհետև մենք ընկերներ ենք: Երկրորդ՝ ես հասկանում եմ, թե ինչու է նման բան տեղի ունենում: Սա կապված է Ղրիմում իրադրության հետ: Այն, ինչ տեղի ունեցավ Ղրիմում, տեղի ունեցավ: Դա լիովին յուրատեսակ երևույթ է, որը կապված է Ուկրաինայում տեղի ունեցող իրադարձությունների հետ: Ղրիմը համարեց, որ Կիևում տեղի ունեցողը պետական հեղաշրջում է, և չճանաչեց այդ իշխանության լեգիտիմությունը»,- ասել է Դորոխինը:
