Շինարարներ 15 հասցեում հսկայական տեխնիկա է աշխատում. վթարային շենքն արագորեն քանդվում է: Բնակիչների մեծ մասը պետության կողմից փոխհատուցում է ստացել, տեղափոխվել նոր տներ: Շենքում, սակայն, շարունակում են դեռ ապրել երկու ընտանիք: Հասմիկ Հովակիմյանը բնակվում է չորրորդ հարկում, բնակության պայմանները, մեղմ ասած, տանելի չեն, ապրում է առանց ջրի, գազի ու էլեկտրականության: Ասում է, որ մեկ սենյականոց փոքր բնակարանում ստիպված են երեքով ապրել՝ աղջկա ու փեսայի հետ: Բնակչուհին վճռական է տրամադրված, նշում է՝ այստեղ ծնվել է, այստեղ էլ կմնա մինչև մահ, եթե կարող են, թող իրեն բռնությամբ երկրից վտարեն: Ասում է՝ այս «բնում» է ապրել երկար տարիներ, հիմա իրեն առաջարկում են մի ուրիշ՝ մի աննշան ավելի մեծ «բուն», սակայն ինքը չի պատրաստվում տեղափոխվել:
Առաջին հարկի բնակիչը՝ Սամվելը, առողջական խնդիրներ ունի, շաքարային դիաբետով է տառապում, անաշխատունակ է, բժիշկները նրան հորդորում են ավելի հանգիստ պայմաններ, կենսակերպ ստեղծել իր համար, մինչդեռ վերջինս նշում է. «Էդ հանգիստը դառել է արդեն կրկնակի, քառակի անհանգիստ, քանի որ ինչ հանգստության մասին կարելի է խոսել: Տունը քանդում են, դու բնակարանում ես գտնվում»:
Յոթ շնչից կազմված այս ընտանիքին տրամադրում են ընդամենը մեկ սենյականոց բնակարան:
Շենքի նախկին բնակիչներից ոմանք հրաժարվել են դուրս գալ բնակարաններից, սակայն նրանց խոստացել են անտանելի պայմաններ ապահովել, որպեսզի ինքնակամ լքեն տարածքը: Ջուրն ու հոսանքն անջատելով՝ շատերին ստիպել են հեռանալ իրենց տներից: Շինարարությունը տասն օր է, ինչ ընթանում է, մեքենաներն աշխատում են անընդմեջ, անդադար, բնակիչների խոսքով՝ կարծես ի հեճուկս իրենց շտապում են:
Երևանի քաղաքապետարանից դեռևս նրանց չեն այցելել, նրանց չի մտահոգում, որ քանդման աշխատանքների հետևանքով կարող են մարդիկ տուժել: Բնակիչներն ասում են՝ աչքերդ փակում ես՝ չիմանալով ինչ կպատահի. քարեր կընկնե՞ն քեզ վրա, թե՞ կկարողանաս հաջորդ օրն էլ վայելել:
Շինարարներ 15 հասցեի բնակիչ Սամվելը փաստաբան ունի՝ Տիգրան Մուրադյանը, ով արդեն իսկ դիմել է ոստիկանություն, նաև՝ քաղաքապետարան, սակայն վերջինս դեռևս չի արձագանքել:
Մանրամասները՝ տեսանյութում:
