armtimes.com-ի փոխանցմամբ՝ ԲՀԿ առաջնորդ Գագիկ Ծառուկյանը 2013 թվականին 4,8 միլիարդ դրամ (մոտ 11 միլիոն ԱՄՆ դոլար) արժողությամբ հասարակական շինության առք և վաճառք է կատարել: Շինության հասցեն հայտարարագրում նշված չէ: Ինչպես տեղեկացելէ կայքը Բարձրաստիճան պաշտոնատար անձանց էթիկայի հանձնաժողով ներկայացրած նրա հայտարարագրից, Ծառուկյանը նաև վաճառել է իր ունեցած հողամասերից մեկը՝ 100,2 միլիոն դրամ արժողությամբ: ԲՀԿ առաջնորդը 2 հատ «Toyota Land Cruiser 2.0» մակնիշի ավտոմեքենա է գնել, յուրաքանչյուրի համար վճարելով 18,2 միլիոն դրամ (մոտ 45 հազար դոլար):
Ծառուկյանի ունեցվածքը նախորդ տարիներին հայտարարագրած ունեցվածքի հետ համեմատելու համար բարդ հաշվապահական աշխատանք է պահանջվում՝ զանազանելու համար, թե որ տարին որքան եկամուտ է ստացել փոխառություններից, որքան է պարտատոմսերից ստացված եկամուտը՝ ըստ փոխարժեքների և այլն: Միայն արձանագրենք, որ ԲՀԿ առաջնորդի դրամական ունեցվածքը 2013 թվականին կազմել է 25,8 միլիարդ դրամ, 41,3 միլիոն դոլար և 23,3 միլիոն եվրո: Պատգամավորը հարկային տարում ունեցել է 1,8 միլիարդ դրամի, 25 միլիոն դոլարի և 150 հազար եվրոյի եկամուտ կանխիկ փողով, ինչպես նաև 4,9 միլիարդ դրամի չափով եկամուտ բնամթերքով: Հարկային տարում պաշտոնյայի հանձնված կամ վերադարձված փոխառությունները կազմել են 24,7 միլիարդ դրամ, 17,6 միլիոն եվրո և 7 միլիոն ԱՄՆ դոլար:
ԲՀԿ առաջնորդի կինը՝ Ջավահիր Ծառուկյանը, հայտարարագրել է 25 միլիոն դրամ և 31 հազար եվրո ունեցվածք: Նախորդ տարի նա 8 միլիոն 534 հազար դրամ արժողությամբ թանկարժեք սպասք է գնել: Իսկ պատգամավորի դուստրը` Անահիտը, տարվա ընթացքում 32 հազար դոլարի և 72 հազար եվրոյի եկամուտ է հայտարարագրել:
Մանրամասները՝ armtimes.com-ում
