Ռուսաստանը տարածաշրջանային հակամարտություններն օգտագործում է ապակայունացման համար: «Առաջին լրատվական»-ի հետ զրույցում այս մասին ասաց Արտաքին հարաբերությունների մոլդովական ասոցիացիայի ղեկավար, քաղաքական վերլուծաբան Վիկտոր Կիրիլեն՝ անդրադառնալով հետխորհրդային տարածքում ռուսական քաղաքականությանն ու դրա հետևանքներին:
Նա ռուսական քաղաքականությունը, մասնավորապես, Մոլդովայի հարևան Ուկրաինայում համարում է անթույլատրելի՝ միջազգային իրավունքի տեսանկյունից: Ըստ նրա՝ Ռուսաստանը ցանկանում է ողջ հետխորհրդային տարածքի երկրներին, որոնք ցանկանում են ընթանալ եվրոպական ուղղությամբ, մտցնել իր ազդեցության գոտի, ինչն ուղիղ սպառնալիք է նաև Մոլդովայի համար, այսինքն՝ հենց Ուկրաինայի ներքին վիճակի ապակայունացումը սպառնալիք է նաև Մոլդովայի համար, քանի որ Ուկրաինան Մոլդովայի համար կարևորագույն ռազմավարական և քաղաքական գործընկեր է:
«Մերձդնեստրը մեծ խնդիր է Մոլդովայի համար, Ուկրաինայի համար ևս, այսօր շատերն են տեսնում, որ տարածաշրջանը Ռուսաստանի ձեռքում գործիք է, ՌԴ-ն օգտագործում է Մերձդնեստրը ողջ տարածաշրջանը ապակայունացնելու համար:
Ես դեռ չեմ տեսնում հակամարտության կարգավորման որևէ եղանակ, որովհետև Ռուսաստանը չի աջակցում դրան, Ռուսաստանը չի ցանկանում լուծել հակամարտությունը, ընդհակառակը՝ օգտագործում և օգտագործելու է այդ հակամարտությունը որպես լծակ ոչ միայն Մոլդովայի, այլև Ուկրաինայի դեմ»,- ասաց Վիկտոր Կիրիլեն:
Վերջինս նաև բացասաբար գնահատեց Արևմուտքի քայլերը: Նրա որակմամբ՝ այն, ինչ Արևմուտքն արել է մինչ այս պահը, որևէ ազդեցություն չի ունեցել Ռուսաստանի գործողությունների վրա, Ռուսաստանը շարունակում է իր ապակայունացնող գործողություններն Ուկրաինայում:
«Ինձ թվում է՝ Ռուսաստանն արդեն հասկացել է, որ Արևմուտքը ոչինչ չի կարող անել այս համատեքստում և հետաքրքրված չէ Ռուսաստանի հետ բաց հակամարտության հարցում: Արևմուտքը պետք է լուրջ պատժամիջոցներ գործի դներ, որոնք Ռուսաստանին կհասկացնեին, որ Արևմուտքի չի նստելու և նայելու, թե ինչ է տեղի ունենում Ուկրաինայում: Հիմա շատերն են ասում, թե Ռուսաստանում արդեն սկսվել է տնտեսական ճգնաժամ, և Ռուսաստանը չի կարողանա առաջ շարժվել, գնում է տնտեսական ստագնացիա, սակայն նրանք ունեն բավարար ռեսուրսներ, գումարներ՝ այդ էքսպանսիան Ուկրաինայում և Մոլդովայում շարունակելու համար: Եվ կշարունակեն՝ չնայած այդ փոքրիկ պատժամիջոցներին»,- ասաց նա:
Խոսելով Մոլդովայի ԱՀ ստորագրման մասին՝ նա ասաց, որ Մոլդովան կստորագրի Ասոցացման համաձայնագիրը, եթե Ռուսատանը չապակայունացնի երկրում իրավիճակը՝ ինչպես դա արեց Ուկրաինայում, իսկ դրա վտանգը կա, քանի որ Ուկրաինան և Մոլդովան նման են՝ և Ուկրաինայում էր Ասոցացման ուղին վայելում հասարակության մեծ մասի աջակցությունը, և Մոլդովայում, սակայն Ուկրաինայում հաջողվեց իրավիճակը ապակայունացնել:
