Վրաստանի վարչապետ Իրակլի Ղարիբաշվիլին վստահ է, որ տեղական ինքնակառավարման մարմինների ընտրությունները կլինեն ժողովրդավարական և ազատ` այնպես, ինչպես նախորդները: Այսպիսին է ներկայիս իշխանությունների քաղաքական կամքը: Այս մասին գրում է «Գրուզիա Օնլայն»-ը:
Կառավարության ղեկավարը Սպորտի պալատում, որտեղ էլ մեկնարկել է «Վրացական երազանքի» նախընտրական քարոզարշավը, հայտարարել է, որ առաջիկա ընտրությունները «կբարձրացնեն երկրում ժողովրդավարության և ազատության որակը»:
«Ամբողջ ժողովրդավարական աշխարհը, գլխավոր միջազգային կազմակերպությունները միաձայն խոստովանել են, որ Վրաստանը հաստատել է իր` եվրոպական արժեքներին հակված լինելը և կարևոր քայլ է կատարել դեպի ժողովրդավարություն: Գլխավորն այն է, որ մեր ժողովուրդը, մեր ընտրողները վստահ են ընտրությունների արդյունքի արդար լինելուն: Այսօր մեր երկիրը կրկին անցել է ընտրական ռեժիմի: Մենք նոր փուլ ենք սկսում: Մենք կրկին հաղթանակի ենք պատրաստվում»,- նշել է Ղարիբաշվիլին:
