Ժնևի լճի ափը, որը հայտնի է իր գեղեցկությամբ, պարզվում է, այնքան էլ անվտանգ վայր չէ։ Այստեղ բնակվող մարդիկ գտնվում են աղետալի ցունամիի սպառնալիքի տակ։ Այս մասին գրում է The Daily Telegraph-ը՝ հղում կատարելով Ժնևի համալսարանի գիտնականների տվյալներին:
Խոսքն առնվազն 1 մլն մարդու մասին է, որոնցից 200 հազարն ապրում է Ժնևում՝ Շվեյցարիայի մեծությամբ երկրորդ քաղաքում, որը աղետի դեպքում ամենախոցելին կարող է լինել։ Այս մասին ասվում է Nature Geoscience ամսագրում հրապարակված գիտական հոդվածում:
Մասնագետները համակարգչի օգնությամբ մոդելավորել են այն աղետը, որը տեղի է ունեցել լճի ափին 6-րդ դարում: Այն ժամանակ լճի գրեթե 8 մետրանոց ալիքը բազմաթիվ մարդկանց կյանքեր է խլել: Աղետի հարվածից տուժել է նաև Լոզանը, մի քանի գյուղ ամբողջությամբ ոչնչացվել է:
Հետազոտողները ենթադրում են, որ ցունամին առաջացել է քարաթափումների հետևանքով, որի ժամանակ ալիքների բարձրությունը հասել է մինչև 13 մետրի:
Գիտնականների խոսքով՝ ցունամիի հետևանքով առաջացած իրադարձությունը չի կարելի համարել բացառիկ: Հետազոտությունները ցույց են տվել, որ նման դեպքը չի կարելի բացառել, քանի որ նման դեպքեր գրանցվել են նաև ավելի ուշ:
