Ե՛վ մրսածության, և՛ վիրուսի դեպքում պատճառը մարդու ցածր իմունիտետն է: «Առաջին լրատվական»-ի հետ զրույցում նման կարծիք հայտնեց բժշկուհի Լիանա Հակոբյանը. «Խորհուրդ է տրվում օգտագործել իմունիտետը բարձրացնող դեղամիջոցներ: Մարդը կարող է ամեն օր սնվել դրսում՝ օգտագործելով «Արագ սնունդ» կոչվածը, և թվում է, թե ունես առողջ տեսք՝ գեղեցիկ մազեր և եղունգներ, բայց իրականում նման սնունդն այնքան է գցում իմունիտետդ, որ ամենաչնչին մանրուքը հետագայում կարող է գրիպով վարակվելու պատճառ դառնալ: Հստակ տարբերակել վիրուսը մրսածությունից դժվար է, որովհետև երկու դեպքում էլ միևնույն ախտանիշերն են: Սակայն երկու դեպքում էլ խորհուրդ է տրվում ամենաառաջինը՝ մեկուսանալ մյուսներին չվարակելու համար, օրվա ընթացքում շատ օդափոխվել(իհարկե այս դեպքում ջերմության տատանումները չպետք է շատ կտրուկ լինեն), խորհուրդ է տրվում արևի տակ շատ լինել, որովհետև արևի ճառագայթները սպանում են վիրուս առաջացնող բակտերիաները:
Բժիշկները խորհուրդ են տալիս նաև շատ հեղուկներ օգտագործել, սակայն այս դեպքում պետք է հստակ իմանալ, արդյո՞ք երիկամների հետ կապված խնդիրներ չունես, որովհետև շատ հեղուկների օգտագործումը կարող է երիկամների ավելորդ ծանրաբեռնվածություն առաջացնել:
Մի բան է հստակ, գրիպը չբուժել չի կարելի: Այն կարող է մի շարք հիվանդությունների սկիզբ դառնալ՝ սկսած գլխուղեղի և ստամոքսաղիքային հիվանդություններից, վերջացրած սիրտանոթային տարաբնույթ հիվանդությունները: Սխալ է նաև այն ձևակերպումը, թե գրիպով ավելի հավանական է վարակվել հիվանդության վերջին մի քանի օրերի ընթացքում: Նման բան չկա, գրիպը սովորաբար տևում է 7 օր և այդ բոլոր 7 օրերի ընթացքում էլ ամենաչնչին շփումը գրիպով հիվանդ մարդու հետ կարող է դառնալ վարակվելու պատճառ»,- ասաց բժշկուհի Հակոբյանը:
Լիանա Հակոբյանը նշեց նաև, որ երեխաներին շատ հաճախ նման դեպքում տալիս են հակաբիոտիկներ, որը բացարձակ ոչ մի կերպ չի օգնում հաղթահարել վիրուսը, այլ հակառակը` կարող է առաջացնել ստամոքսային խանգարումներ:
