Երեկ կեսօրին Երևանի կենտրոնական՝ Խանջյան փողոցում երթևեկությունը մի քանի ժամ կաթվածահար եղավ: Խանջյան 20 հասեում՝ Jose ռեստորանային համալիրի հարևանությամբ կառուցվող շինության երրորդ հարկն ամբողջությամբ փլվել էր հենց շինարարության պահին՝ շինարարներից ոմանց թողնելով փլատակների տակ:
Երեկ դեպքի վայրում ՀՀ արտակարգ իրավիճակների փրկարար ծառայության պետի տեղակալ և ԱԻՆ արտակարգ ալիքի տնօրեն Նիկոլայ Գրիգորյանն ասել էր, որ փլուզման պատճառների մասին հստակորեն կարելի կլինի խոսել փորձագիտական եզրակացությունից հետո:
«Այսքան մարդ է տուժել, քրեական գործ կհարուցվի, և նյութերով կներգրավվեն տարբեր փորձագետներ, որոնք կներկայացնեն տվյալներ»,- նշել էր Գրիգորյանը:
Արդեն հայտնի է, որ Երևանի ՀՀ ոստիկանությունը դեպքի կապակցությամբ երեկ քրեական գործ է հարուցել ՀՀ քր.օր.-ի 157-րդ հոդվածի հատկանիշներով (Աշխատանքի պաշտպանության կանոնները խախտելը): Իսկ ո՞վ էր խախտել աշխատանքի պաշտպանության կանոնները:
Երևանի քաղաքապետարանի հասարակայնության հետ կապի և լրատվության վարչությունից տեղեկացրել էին, որ Խանջյան 20 հասեում՝ Jose ռեստորանային համալիրի հարևանությամբ շինաշխատանքներ է իրականացրել «Չիլինգարյան դիզայն և քոնսթրաքշն» ՍՊԸ-ն:
Ավելի վաղ «Երևաննախագիծ» ինստիտուտի նախկին տնօրեն, ճարտարապետ Գուրգեն Մուշեղյանը շենքի փլուզման մի քանի պատճառ էր առանձնացրել: Նա եղել էր դեպքի վայրում և եզրակացրել, որ պատճառը վերևի հարկի ծածկն անելու ժամանակ տախտակամածի՝ «աբալովկա» կոչեցյալի ոչ լիարժեք ամրությունն էր եղել:
«Բետոն լցնելու ժամանակ էլ, հավանաբար, փլուզումը եղել էր: Տակի ծածկի սյուներն էլ էին վնասված, լավ կլիներ ընդհանրապես քանդել այդ սյուները: Պետք է փորձաքննություն կատարվի՝ պարզելու փլուզման պատճառները, բայց առաջին տպավորությունս այն էր, որ շինարարները շինարարական տեխնոլոգիաների պահպանման կանոններն են խախտել: Կարող է նաև հաշվարկների մեջ են սխալվել»,- ասել էր ճարտարապետը:
Փորձաքննության արդյունքում պարզ կդառնա, թե կոնկրետ որ կետում են սխալվել շինարարական ընկերության ներկայացուցիչները:
Սակայն մինչ այդ «Առաջին լրատվական»-ը փորձեց պարզել, թե ինչ գործունեությամբ է զբաղվում «Չիլինգարյան դիզայն և քոնսթրաքշն» ՍՊԸ-ն՝ ինչ նախագծեր ունի ընթացքում և որոնք է հեղինակել:
Հետաքրքրական էր այն տեղեկությունը, որ ընկերությունն իրականացնում է շինաշխատանքներ Սուրբ Աննա եկեղեցու և Ամենայն Հայոց Կաթողիկոսի երևանյան նստավայրում` Աբովյան և Սայաթ-Նովա փողոցների խաչմերուկում, Սբ. Կաթողիկե եկեղեցու շրջակայքում: Այն նախատեսված է շահագործման հանձնել 2013թ.-ին:
«Չիլինգարյան դիզայն և քոնսթրաքշն» ՍՊԸ-ն հանդիսանում է որպես գլխավոր կապալառու, իրականացնում է կապիտալ շինարարությունը և ամբողջ շենքի հարդարման աշխատանքները:
ՀՀ Կառավարության թիվ 1 շենքի բակում նոր վարչական շենքի կառուցման գլխավոր կապալառուն ևս «Չիլինգարյան դիզայն և քոնսթրաքշն» ՍՊԸ-ն է. շենքը նախատեսված է շահագործման հանձնել 2013 թ.-ին : Ընկերությունը իրականացնում է կապիտալ շինարարությունը և ամբողջ շենքի հարդարման աշխատանքները:
Շինարարական ընկերությունը նաև նախատեսում է այս տարի շահագործման հանձնել բազմաֆունկցիոնալ համալիր Բուզանդի 3 հասցեում` Ադամյան և Բուզանդ փողոցների խաչմերուկում:
Ընկերությունն արդեն իսկ բազմաթիվ շենքերի շինաշխատանքներ է կատարել, բազմաթիվ նախագծեր էլ իրականացման փուլում են: Սակայն հարց է՝ դրանք իրենց ավարտին կհասնե՞ն, թե՞ շինարարական աշխատանքների կանոնները կխախտվեն, և կիսակառույցը փուլ կգա շինարարների գլխին:
