Հունական ԶԼՄ-ների փոխանցմամբ՝ երկրի իրավապահ մարմինները ցրել են կրոնական պահպանողականների ցույցը, որոնք բողոքում էին Աթենքի թատրոնում «աստվածանարգ» ներկայացման դեմ: Հավատացյալների և ոստիկանության բախման ընթացքում ոստիկանները ստիպված են եղել արցունքաբեր գազ կիրառել:
Տուժածների մասին տեղեկություն չկա: Երկու շաբաթ առաջ վիրավորված ուղղափառները ներխուժել էին «Հիտիրիո» թատրոն և ընդհատել «Քրիստոսի մարմինը» ներկայացումը: Ոստիկանությունը ստիպված է եղել միջամտել՝ անկարգությունները կանխելու համար:
Հավատացյալների վրդովմունքն առաջացրած ներկայացման մեջ Նոր կտակարանի իրադարձութունները մեկնաբանվում են որպես միասեռական սիրո պատմություն: Որպես գործողությունների վայր ընտրված է ԱՄՆ Տեխաս նահանգը:
Հունաստանի օրենքներով՝ աստվածանարգությունը քրեական հանցագործություն է: Այդ հոդվածը, սակայն, հազվադեպ է կիրառվում:
Կրոնական արժեքների պաշտպանությամբ հանդես է եկել ուլտրաաջ «Ոսկե լուսաբաց» կուսակցությունը: Անկարգություններին մասնակցած պատգամավորներից մեկի նկատմամբ քրեական գործ է հարուցվել:
Հունաստանում շարունակվում են քննարկումները կրոնի նկատմամբ խոսքի ազատության սահմանների վերաբերյալ: Աջերը պնդում են, որ աստվածանարգության մասին օրենքը պետք է լայնորեն կիրառվի, ձախերը հանդես են գալիս այն չեղյալ հայտարարելու օգտին:
