Վրաստանի խորհրդարանն այսօր հաստատեց կառավարության նոր կազմը:
Ժամեր առաջ նորընտիր խորհրդարանում ելույթ ունեցավ մեծամասնություն կազմող «Վրացական երազանք» կուսակցության նախագահ Բիձինա Իվանիշվիլին: Այս մասին «Առաջին լրատվական»-ի հետ զրույցում տեղեկացրեց «Բազմազգ Վրաստան» քաղաքացիական շարժման նախագահ Առնոլդ Ստեփանյանը:
Ստեփանյանը տեղեկացրեց նաև, որ Իվանաշվիլին իր ելույթում անդրադարձել է փոքրամասնություններին և նշել, որ կաջակցի ինտեգրացիայի պրոցեսներին. «Փոքրասմանություններ ասելով՝ Իվանաշվիլին կոնկրետ հայերի կամ որևէ այլ ազգի անուն չտվեց, բայց կարծում եմ, որ արդեն իսկ մեծ քայլ էր նրա կողմից հայ համայնքի հետ հանդիպելը:
Այսօր դեռ վաղ է խոսել նրանց ծրագրերից, դեռ նախարարներն իրենց աշխատասենյակնեը չեն ստացել, դեռ ոչինչ պատրաստ չէ: Բայց վստահ եմ, որ այն ամենը, ինչի մասին Իվանաշվիլին նախկինում խոսել է, այդ թվում՝ նաև հայերի հետ կապված ծրագրերը, ռեալ ժամանակում իրականություն կդառնան: Եվ դա շատ կարևոր է հայ-վրացական երկկողմանի հարաբերությունների համար:
Իր ելույթում Իվանաշվիլին նշեց նաև, որ կարևոր են այս առումով փոքրամասնությունների լեզվի և մշակույթի խնդիրները, այդ պատճառով, անհրաժեշտության դեպքում, Վրաստանում կլինի բազմալեզու ուսուցում»:
Առնոլդ Ստեփանյանը անդրադարձավ նաև Բիձինա Իվանաշվիլու արած այն հայտարարությանը, որ նա մեկուկես տարի հետո պատրաստվում է լքել քաղաքականությունը. «Իվանաշվիլին հայտարարել էր, որ պատրաստվում է լքել քաղաքականությունը մեկուկես տարի հետո։ Կարծում եմ, հենց այդպես էլ կլինի, եթե նա հասցնի այդ ժամանակահատվածում իրականացնել բոլոր ծրագրերն ու բարեփոխումները: Իսկ եթե ժամանակը չբավականացնի այդ ամենն անելու համար, հնարավոր է՝ մի փոքր ավելի ուշ անցնի հանրային սեկտոր»,- նշեց Ա. Ստեփանյանը:
