Դամասկոսը միջազգային հանրությունից, մասնավորապես ՄԱԿ-ի Անվտանգության խորհրդից պահանջել է ուսումնասիրել Ֆրանսիայի քաղաքականությունը, որը «բացասական դեր է խաղում սիրիական ճգնաժամի կարգավորման գործում և խոչընդոտում է երկրում բռնության և ահաբեկչության դադարեցմանը, խրախուսում է ահաբեկիչների գործողությունները և նրանց հանցագործությունների շարքը անմեղ քաղաքացիների դեմ»:
Սիրիայի ԱԳՆ հաղորդագրության մեջ ասվում է, որ նման քաղաքականությունը այն պահին, երբ ՄԱԿ-ը ջանքեր է գործադրում կարգավորելու ճգնաժամը և Սիրիա է ուղարկում իր բանագնացին, սպառնալիք են հանդիսանում ոչ միայն Սիրիայի և տարածշրջանի, այլև ամբողջ աշխարհի խաղաղության և անվտանգության համար: «Սիրիայում ահաբեկչության և բռնության պաշտպանւթյան գործում Ֆրանիայի դերակատարությունը ֆրանսիական կառավարությունների գաղութային քաղաքականության հետևանք են, որը Սիրիայի դեմ վարում են նրա անկախություն ստանալուց ի վեր»,- ասվում է հաղորդագրության մեջ, որը մեջբերում է պետական Sana գործակալությունը:
Սիրիայի ԱԳՆ-ն միջազգային հանրության ուշադրությունն է հրավիրել այն հանգամանքի վրա, որ Ֆրանսիայի կողմից սիրիացի ահաբեկիչների պաշտպանությունը, այդ թվում՝ նրանց նյութական և ֆինանսական օգնության տրամադրումը միջազգային իրավունքի և ՄԱԿ-ի կանոնադրության, ինչպես նաև Ֆրանսիայի կողմից որպես ՄԱԿ-ի ԱԽ մշտական անդամ իր վրա վերցրած պարտավորությունների խախտում է:
Ֆրանսիան սիրիական կողմի այս մեղադրանքներն անվանել է սյուրռեալիստական: «Սիրիայի վարչակարգը պատասխանատու է ավելի քան 35 հազար մահվան, ավելի քան 300 հազար փախստականների և ավելի քան մեկ միլիոն վերաբնակեցված անձանց համար: Վարչակարգը սեփական ժողովրդի դեմ կազմակերպում է ակտիվ ռմբակոծություններ, այդ թվում՝ կասետային ռումբերի կիրառմամբ: Նա փորձում է երկրի ներսում իր սադրած քաոսը տարածել հարևան երկրներում»,- հայտարարել է Ֆրանսիայի ԱԳՆ ներկայացուցիչը:
