Պաղեստինի գրոհայինները կրակի տակ են պահում Իսրայելի հարավը: Միայն չորեքշաբթի այդ շրջանում ընկել է մոտ 65 հրթիռ և արկ: Հրթիռներից մեկն ընկել է բնակելի տան վրա, երկու մարդ ծայրահեղ ծանր վիճակում ուղղաթիռներով տեղափոխվել են հիվանդանոց:
Իսրայելի «Երկաթե գմբեթ» ՀՀՊ համակարգը միայն մեկ ժամում ոչնչացրել է 7 հրթիռ: Այն, սակայն, չի կարող ոչնչացնել ականանետային արկերը:
Ինչպես հաղորդում է «Ազատություն» ռադիոկայանի ռուսական ծառայությունը, Հոֆ Աշկելոն շրջանում վիրավորվել է մի կին, որը չի հասցրել թաքնվել ապաստարանում: Մի շարք շրջանների մանկապարտեզներում և դպրոցներում դադարեցվել են պարապմունքները:
Մեկ այլ ռմբակոծվող քաղաքում՝ Սդերոտում, դասերը չեն դադարեցվել, քաղաքապետը սպառնում է ակցիա անցկացնել Երուսաղեմում՝ որպես բողոքի նշան քաղաքային բյուջեի կրճատման դեմ: Սդերոտը գործնականում ամեն օր ռմբակոծության է ենթարկվում, մինչդեռ քաղաքում չեն բավականացնում հասարակական ռմբապաստարանները:
Այժմ ռմբակոծությունը դադարել է, սակայն բանակը զգուշացնում է, որ այն կարող է վերսկսվել ցանկացած պահի: Ռմբակոծվող քաղաքների բնակիչներին կարգադրվել է դուրս չգալ ապաստարաններից:
