Իսրայելցի գիտնականները եկել են այն եզրակացության, որ նարգիլե ծխելը նվազեցնում է վարորդների ուշադրությունը, ինչը 40 տոկոսով բարձրացնում է վթարային իրավիճակների առաջացման ռիսկը: Այս մասին հաղորդում է Newsru.com-ը:
Իսրայելի տեխնոլոգիական համալսարանի՝ Տեխնիոնի և Ցֆատ քաղաքի Զիվ բժշկական կենտրոնի գիտնականների հետազոտությանը մասնակցել են 100 վարորդներ: 70 կամավորների, այդ թվում` նաև կին վարորդների, առաջարկվել է փորձից առաջ նարգիլե ծխել, որից հետո նրանք դրա ազդեցության տակ պետք է 10 կմ ճանապարհ անցնեին: Ուսումնասիրելով ծխողների և չծխողների արդյունքները` հետազոտողները եկել են այն եզրակացության, որ առաջին խմբի մասնակիցները 40 տոկոսով ավելի հաճախ են հայտնվել վթարային իրավիճակներում: Մասնավորապես, նրանք հաճախ են անցել կարմիր լույսի տակով, քան վերահսկվող խմբի մասնակիցները:
Գիտնականների կարծիքով` զգոնության նվազումը տեղի է ոնենում արյան մեջ ածխածնային օքսիդի մակարդակի բարձրացման հաշվին: Նարգիլե ծխելուց հետո ածխածնային օքսիդի մակարդակը հասնում է 100-200 սիգարետի մակարդակին, իսկ օրգանիզմում գործընթացը շարունակվում է մինչև 6 ժամ:
Հետազոտական խումբը գլխավորած բժիշկ Վաֆա Էլիասի խոսքով՝ շատերը կարծում են, որ նարգիլեն սիգարետից անվտանգ է, քանի որ շատ վնասակար նյութեր մնում են ջրում, որի միջոցով էր անցնում է ծուխը, սակայն դա այդպես չէ: Ջուրը սառեցնում է ծուխը և թույլ տալիս, որ այն ավելի խորն անցնի թոքերի մեջ:
