Irib News-ի փոխանցմամբ՝ Իրանի խորհրդարանի նախագահ Ալի Լարիջանին, ելույթ ունենալով Իրանի գիտա-տեխնիկական համալսարանի ուսանողների առջև, հայտարարել է, որ վերջին 10 տարում Արևմուտքը ստում է Իրանի միջուկային ծրագրի մասին.
«Արևմուտքի համար միջուկային հարցը միայն պատրվակ է միջազգային արենայում իրեն ցույց տալու համար: Այդ պնդումը բխում է արևմտյան ներկայացուցիչների հետ բանակցելու իմ անձնական փորձից: Արևմտյան բանագնացները բազմիցս հանդիպումների կուլիսներում հայտարարել են, թե իրենց մտահոգում է այն փաստը, որ տարածաշրջանում իրավիճակը փոխվում է հօգուտ Իրանի:
Նրանք մտածում են միայն թնշամանքի ու գերիշխանության մասին՝ որպես գործիք օգտագործելով միջուկային հարցը: Եթե մենք կանգնեցնենք ծրագիրը, ապա նրանք կգտնեն մեկ այլ պատրվակ: Օրինակ՝ մարդու իրավունքների խախտման հարցը: Իրանում մարդու իրավունքների գծով հատուկ զեկուցող Ահմեդ Շահինի պատրաստած զեկույցը չի արտացոլում գործերի իրական դրությունը: Կարծես թե նա ոչ հավաստի տեղեկատվություն է ստացել երկրորդական աղբյուրներից»:
