Ադրբեջանական «Ենի Մուսավաթ» թերթի փոխանցմամբ՝ Բաքվում ձերբակալվել է հոկտեմբերի 5-ին կրթության նախարարության շենքի առջև իսլամիստների անցկացրած բողոքի ակցիայի գլխավոր կազմակերպիչ Ջավիդ Մահմեդհուսեինօղլու Մամեդովը:
Նշվում է, որ այդ ակցիայի շարքային մասնակիցները ծանոթ չեն եղել դրա կազմակերպիչների հետ, ինչի համար էլ իրավապահները երկար ժամանակ չեն կարողացել պարզել, թե ով կազմակերպել այդ ակցիան, և կրոնական որ համայնքին է նա պատկանում: Ի վերջո, իրավապահներին հաջողվել է պարզել, որ դա 10 տարի Սիրիայում և Իրանում բնակված ու կրթություն ստացած Ջավիդ Մամեդովն է:
Բաքվի ոստիկանությունը հայտարարել է, թե իրենք ունեն ապացույցներ, որ Մամեդովը սերտ կապերի մեջ է արմատական կրոնական կազմակերպությունների, ինչպես նաև Սիրիայի ու Իրանի հատուկ ծառայությունների հետ: Մամեդովը թաքնվում էր Բաքվում, և նրա տանն իրականացված խուզարկության արդյունքում հայտնաբերվել ու առգրավվել են զենք, կրոնական մաքսանենգ գրականություն և մեծ քանակությամբ իրանական ու սիրիական արժույթ:
Հիշեցնենք, որ հոկտեմբերի 5-ին շուրջ 200 իսլամիստներ բողոքի ակցիա էին կազմակերպել Ադրբեջանի կրթության նախարարության շենքի առջև՝ պահանջելով վերացնել դպրոցներում հիջաբ (մահմեդական գլխաշոր) կրելու արգելքը։
