Ինչպես լրագրողներին տեղեկացրել է եգիպտական դատախազության ներկայացուցիչը, Կահիրեի դատարանի նիստն՝ ամերիկացի քահանա Թերրի Ջոնսոնի և ութ այլ հոգևորականների նկատմամբ, որոնք մեղադրվում են «Մուսուլմանների անմեղությունը» հակամահմեդական ֆիլմի ստեղծմանը և տարածմանը մասնակցելու մեջ, հետաձգվել է մինչև նոյեմբերի 25–ը։
Առաջին նիստը, որը սկսվել է ժամը 11.30-ին, 15 րոպե էլ չի տևել: Դատավորների որոշմամբ նիստը տեղափոխվել է՝ գործի նյութերին ավելի մանրամասն ծանոթանալու համար: Դատարանի դահլիճում ներկա չեն եղել ո՛չ մեղադրյալները, որոնք գտնվում են ԱՄՆ-ում, ո՛չ նրանց փաստաբանները:
«Մուսուլմանների անմեղությունը» ֆիլմի ստեղծմանը մասնակցել են մի քանի ղպտիներ, որոնք Եգիպտոսից տեղափոխվել են ԱՄՆ և ներկայումս բնակվում են այնտեղ: Սեպտեմբերի վերջին Եգիպտոսի գլխավոր դատախազությունը դատարան էր հանձնել յոթ ղպտիների մասին գործը, որոնք մեղադրվում են մահմեդականների կրոնը չհարգելու, Մուհամմեդ մարգարեի անունը անարգելու և Եգիպտոսում միջկրոնական տարաձայնություններ առաջացնելու մեջ:
Բացի այդ, Եգիպտոսի գլխավոր դատախազ Աբդելմագիդ Մահմուդը պաշտոնապես դիմել է Ինտերպոլին և ԱՄՆ-ի իշխանություններին՝ Եգիպտոսում մեղադրվող քրիստոնյաներին հայտնաբերելու և ձերբակալելու խնդրանքով։
