Հանրապետության հրապարակը հայ ժողովրդի պարծանքն է, հյուրանոցն այնտեղ հարիր չէ: Այսօր լրագրողների հետ հանդիպման ժամանակ ասաց Սպառողների ասոցիացիայի նախագահ Արմեն Պողոսյանը՝ խոսելով ԱԳՆ շենքի վաճառքի մասին: Նա նշեց, որ ԱԳՆ շենքի վաճառքն ամենացավոտ հարցերից է և վրդովված հավելեց, որ դա չի կարելի հանդուրժել: «Մեր հրապարակը մեր պարծանքն է, հյուրանոցը չի սազում: Մոսկվայում Կարմիր հրապարակի վրա հյուրանոց չկա: Սա անթույլատրելի բան է: Կարծես՝ Էռնեկյանի բարի գործերի հատուցման մի ձև է ԱԳՆ շենքը նրան վաճառելը: Լավ կլիներ, որ շենքի նշանակությունը մնար անփոփոխ»,- պարզաբանեց Արմեն Պողոսյանը:
Անդրադառնալով քաղաքի կանաչապատման ծրագրին՝ նա ասաց, որ այն օգտակար է, տեսանելի է, բայց դա բավարար չէ: Սա, նրա մեկնաբանմամբ, ավելի շատ կապված է տեխնիկական և նյութական հնարավորությունների հետ, եթե ամբողջ քաղաքում ոռոգման ցանցը նորմալ չգործի, կանաչապատման աշխատանքներն անօգուտ կդառնան:
Արմեն Պողոսյանն արձանագրեց, որ կա արատավոր տրամաբանություն՝ կենտրոնից դեպի «պերեֆիրիա»․ «Կենտրոնում լավ է խնամքի առումով, որքան կենտրոնից հեռանում ես այնքան վատ է: Դրական գործ արվում է, բայց դրանք ֆրագմենտներ են: Շատ լավ է, որ կան տեղեր, որտեղ խնամքը հետևողականորեն է կատարվում»:
