Российская газета-ին տված հարցազրույցի ժամանակ Հարավային Օսիայի նախագահ Լեոնիդ Թիբիլովն անդրադարձել է Վրաստանի հետ հարաբերությունների կարգավորման խնդրին.
«Ցխինվալը պատրաստ է Թբիլիսիի հետ հաստատել իրավահավասար հարաբերություններ՝ պայմանով, որ նա ճանաչի Հարավային Օսիայի անկախությունը և մեզ հետ ստորագրի չհարձակման մասին երաշխիքներ: Հարավային Օսիան բազմիցս հայտարարել է այդ մասին: Բացի այդ, Վրաստանը պետք է մեզ փոխհատուցում վճարի իրականացրած ագրեսիայի համար: Չնայած Վրաստանում իրականացված իշխանափոխությանը՝ դեռ վաղ է որևէ եզրակացություն անելը:
Անհրաժեշտ է, որ Վրաստանը ստորագրի Հարավային Օսիայի նկատմամբ ուժ չգործադրելու մասին փաստաթուղթ: Հարավային Օսիայի նկատմամբ իրականացված վրացական ագրեսիան պետք է համարժեք իրավական-քաղաքական գնահատականի արժանանա բուն Վրաստանում:
Բոլոր շահագրգիռ կողմեր պետք է գիտակցեն տարածաշրջանի նոր իրողությունները, ինչը նրա խաղաղ զարգացման գրավականն է: Եթե դա տեղի չունենա, ապա մեր և Վրաստանի միջև հարաբերություններում անհնար կլինի խոսել որևէ փոփոխության մասին»:
