ԱՄՆ պետքարտուղարր Հիլարի Քլինթոնը մարդասպան Ռամիլ Սաֆարովի արտահանձնման առնչությամբ ԱՄՆ կառավարության «խոր հիասթափությունն» է փոխանցել Հունգարիայի արտգործնապարար Յանոս Մարտոնիին, որն այս շաբաթ պետական այցով գտնվում է Վաշինգտոնում: Այս մասին հայտնում են ԱՄՆ-ն պետքարտուղարության աղբյուրները:
Ի պատասխան Հայաստանի հանրային հեռուստաընկերության վաշինգտոնյան թղթակից Հայկարամ Նահապետյանի հարցի, պետդեպարտամենտի մամլո խոսնակը նշել է, որ «պետքարտուղար Քլինթոնը հերթական անգամ ամերիկյան կառավարության խոր հիասթափությունն է հայտել, որ Հունգարիան դատապարտված մարդասպան Ռամիլ Սաֆարովին արտահանձնել է Ադրեջանին, որտեղ նրան անմիջապես ներում են շնորհել: Այդ որոշումը վնասում է Հայաստանի և Ադրբեջանի միջև վստահությանը և խաղաղ գործընթացին»:
«Մենք ողջունում ենք պետքարտուղար Քլինթոնի շարունակական ջանքերը՝ հասկացնելու հունգարացի առաջնորդներին, թե ինչպես է նրանց կողմից իր արարքի համար չզղջացող մարդասպան Սաֆարովի անմիտ արձակումն ու տեղափոխումն Ադրբեջան անդրադարձել խաղաղության գործընթացի վրա ,- մեկնաբանել է Հայ Դատի հանձնախմբի գործադիր տնօրեն Արամ Համբարյանը։- Հանուն խաղաղության՝ մենք կոչ ենք անում պետքարտուղարին իր քննադատական խոսքերը Ադրբեջանի և Հունգարիայի հանդեպ վերածել իրականության՝ արգելելով ամերիկյան զենքի վաճառքը Բաքվին և կասեցնել ռազմական օգնությունը ադրբեջանական զինված ուժերին»:
Նշենք, որ ԱՄՆ-ն առաջիններից էր, որ մտահոգություն հայտնեց Սաֆարովի արտահանձնման և Ալիևի կողմից նրան ներում շնորհելու, կոչումը բարձրացնելու առնչությամբ:
