Ոստիկանությունը դեռ Գլխավոր դատախազություն ետ չի ուղարկել «Բարգավաճ Հայաստան» կուսակցության անդամ, Վայոց ձորի նախկին մարզպետ Սերգեյ Բագրատյանի գործը: Այդ մասին այսօր «Առաջին լրատվական»-ին տեղեկացրեց Գլխավոր դատախազի մամուլի քարտուղար Սոնա Տռուզյանը:
Հիշեցնենք, որ Ոստիկանության լրատվության համաձայն` Սերգեյ Բագրատյանը սեպտեմբերի 23-ի ՏԻՄ ընտրությունների ժամանակ մտել է մարզի Արտաբույնք գյուղի ընտրատեղամաս, փորձել է քվեաթերթիկներ վերցնել, հետո հարվածել է իր այդ գործողությունը կանխել ցանկացող ոստիկանին: Տեղեկատվության համաձայն` միջադեպին մասնակցել էր նաև նախկին մարզպետի որդին:
Դեպքից անմիջապես հետո ոստիկանությունն այս միջադեպի հետ կապված նյութեր էր նախապատրաստել և ուղարկել Գլխավոր դատախազություն: Սակայն Գլխավոր դատախազությունը այն ետ էր ուղարկել ոստիկանություն` նախապատրաստված նյութերը թերի լինելու պատճառաբանությամբ: Այդ միջադեպից մոտ 1 ամիս է անցել, սակայն ոստիկանությունը այդ նյութերը դեռ չի լրացրել և ետ չի ուղարկել դատախազություն:
Ոստիկանությունից մեզ չհաջողվեց ճշտել դրա պատճառը` արդյոք միջադե՞պն այդքան լուրջ չէր, թե՞ ընդհանրապես միջադեպ էլ չի եղել, որ դրա հետ կապված նյութեր լինեն, և ոստիկանությունն էլ դրանք կարողանա նախապատրաստել: Թե՞ իշխանություններին պարզապես անհրաժեշտ էր ԲՀԿ-ի շուրջ աղմուկ բարձրացնել: Կամ միգուցե միջադեպ եղել է, նախկին մարզպետը ծեծել է ոստիկանին, բայց ԲՀԿ-ի և իշխանությունների միջև այդ գործն առայժմ սառեցնելու քաղաքական պայմանավորվածությո՞ւն է ձեռք բերվել:
Ավելացնենք, որ մեր երկրում նման դեպքերը` հատկապես ԲՀԿ անդամների հանցագործությունների հետ կապված, միշտ էլ լուծվել են ոչ թե իրավապահ համակարգում, այլ քաղաքական պայմանավորվածության արդյունքում: Եվ չի բացառվում, որ այդ գործն էլ իշխանությունները պահում են համապատասխան պահին ԲՀԿ-ի դեմ օգտագործելու համար:
