Orange Հիմնադրամը և Վորլդ Վիժն Հայաստանը ամփոփում են «Պահենք երեխաներին ընտանիքում» SMS-հանգանակության սեպտեմբեր ամսվա արդյունքները
Այսօր Orange Հիմնադրամը և Վորլդ Վիժն Հայաստանը հայտարարեցին «Պահենք երեխաներին ընտանիքում» SMS բարեգործական նախագծի սեպտեմբեր ամսվա արդյունքների մասին: Նախագիծը թույլ է տալիս Orange-ի բաժանորդներից յուրաքանչյուրին աջակցություն ցուցաբերել այն հայ մանուկներին, ում ընտանիքները ֆինանսական դժվարությունների պատճառով իրենց երեխաներին հանձնում են պետական հաստատությունների հոգածությանը:
Սեպտեմբեր ամսին Orange-ի բաժանորդները նվիրաբերել են 299 600 ՀՀ դրամ: Ինչպես և նախորդ ամսիներին, Orange Հիմնադրամն այս գումարը կրկնապատկում է` Վորլդ Վիժն Հայաստանին փոխանցելով 599 200 ՀՀ դրամ: Այս գումարը Վորլդ Վիժն Հայաստանը կօգտագործի Սյունիքի մարզում բնակվող մի ընտանիքի օգնելու համար: Ընտանիքը բաղկացած է երիտասարդ մորից և երկու երեխաներից: Մայրը` Շողիկը, բարդ սոցիալական պայմաններից դրդված՝ 13-ամյա դստերը և 14-ամյա որդուն ստիպված է եղել հանձնել խնամքի հաստատության հոգածությանը: Հանգանակված գումարով հնարավոր կլինի ձեռք բերել տնային պայմաններում հրուշակեղենի արտադրության համար անհրաժեշտ սարքավորումներ, ինչը թույլ կտա Շողիկին գումար վաստակել և երեխաներին ինքնուրույն մեծացնել տանը:
«Նախագծի մեկնարկից ի վեր ավելի քան 5800 բաժանորդ է նվիրատվություն կատարել, իսկ շատերը մի քանի անգամ են գումար նվիրաբերել: Շնորհակալություն ենք հայտնում այս նախաձեռնությանը մասնակցած մեր բոլոր բաժանորդներին: Orange Հիմնադրամը կրկնապատկել է նրանցից յուրաքանչյուրի ներդրումը: Կոչ ենք անում մեր բաժանորդներին կրկին նվիրաբերել 100 կամ 500 դրամ, քանի որ հոկտեմբեր ամսվա հանգանակության արդյունքում կրկին մեկ հայ երեխա կվերադառնա ընտանիք»,- ասաց Հայաստանում Orange Հիմնադրամի խորհրդի նախագահ Ֆրանսիս Ժելիբտերը:
«Orange-ի բաժանորդների հանգանակության և Orange Հիմնադրամի շնորհիվ մենք արդեն կարողացել ենք ընտանիք վերադարձնել 6 երեխայի` ստեղծելով եկամուտի աղբյուր նրանց ծնողների համար: Նախագիծն ընտանիքի կայուն զարգացման վրա է հենվում, այլ ոչ թե պարզ բարեգործության, քանի որ փոքրիկ հանգանակությունների արդյունքում հնարավորություն է ստեղծվում տնտեսական կայունություն հաստատել ընտանիքներում», – ասաց Վորլդ Վիժն Հայաստանի տնօրեն Գրահամ Սթրոնգը:
Կարիքի մեջ գտնվող ընտանիքներին Orange-ի բաժանորդները կարող են օգնել` ուղարկելով SMS 1234 կարճ համարին և հանգանակելով 100, իսկ 5678 համարին` 500 դրամ:
«Պահենք երեխաներին ընտանիքում» SMS բարեգործական նախագիծը կտևի մինչև 2013թ. հունիս ամիսը: Այս ընթացքում Orange Հիմնադրամը պարբերաբար կտեղեկացնի հանգանակված գումարի, ինչպես նաև այն երեխաների և ընտանիքների մասին, ովքեր ընդգրկվել են նախագծում:
Անձնական տվյալների գաղտնիության պահպանման նկատառումներով նախագծում ընդգրկված ընտանիքի անդամների ազգանունը և երեխաների անունները նշված չեն:
