Վենեսուելան վտարել է պարագվայցի դիվանագետներին

Վենեսուելայի կառավարությունը հոկտեմբերի 17-ին որոշում է ընդունել երկրից պարագվայցի դիվանագետների վտարման մասին: Այս մասին հայտնում է Associated Press-ը:

Վենեսուելայում Պարագվայի դեսպան Վիկտոր Կասարտելիի խոսքերով` իրեն և իր երեք գործընկերներին հրամայվել է 3 օրվա ընթացքում հեռանալ երկրից:

Վենեսուելայի իշխանությունները չեն մեկնաբանել այդ որոշումը: Կասարտելիի խոսքով` այն բանից հետո, երբ Վենեսուելայի իշխանությունները Պարագվայից հետ կանչեցին իրենց դեսպանին, նրանք Պարագվայի իշխանություններից սպասում էին պատասխան արձագանքի: Ռեակցիայի բացակայության պարագայում, կառավարությունը որոշել է անձամբ վտարել Պարագվայի ներկայացուցիչներին իր երկրից:

Ավելի վաղ՝ 2012-ի հուլիսին, Պարագվայի կառավարությունը` նախագահ Ֆեդերիկո Ֆրանկոյի գլխավորությամբ, Վենեսուելայից հետ էր կանչել իր դեսպանին` Ուգո Չավեսի կաբինետին մեղադրելով պարագվայցի զինվորականների վրա ճնշում գործադրելու փորձերի մեջ` հունիսին իշխանությունից հեռացած Պարագվայի նախկին նախագահ Ֆերնանդո Լուգոյի նկատմամբ իմփիչմենթ թույլ չտալու նպատակով:

Պարագվայը նաև պերսոնա նոն գրատա էր հայտարարել Վենեսուեալայի դեսպանին, չնայած Վենեսուելայի իշխանությունները նրան Պարագվայից հետ էին կանչել դեռևս հունիսին: Այդ ժամանակ Կարակասը դադարեցրեց նավթի մատակարարումը Պարագվայ` ի նշան Ֆերնանդո Լուգոյի պաշտոնաթողության դեմ բողոքի:

Պարագվայի Կոնգրեսը Լուգոյի դեմ իմփիչմենթ էր հայտարարել հունիսի 22-ին: Նման որոշման պատճառը հունիսի 15-ին ոստիկաների հետ հողազուրկ գյուղացիներին ընդհարումներն էին, որոնց հետևանքով 17 մարդ էր զոհվել: Նոր նախագահ դարձավ Ֆեդերիկո Ֆրանկոն, որը նախկինում զբաղեցրել էր փոխնախագահի պաշտոնը:

Հարավամերիկյան պետությունները, այդ թվում՝ Վենեսուելան, Լուգոյի պաշտոնաթողությունը անվանել են պետական հեղաշրջում և չեն ճանաչել Պարագվայում իշխանափոխության օրինականությունը: MERCOSUR և UNASUR հարավամերիկյան կազմակերպությունը Պարագվայի անդամակցությունը դադարեցրին մինչև 2013-ի ապրիլ, երբ Պարագվայում կկանայան նախագահական ընտրություններ։