Հսկայական կարողության տեր միլիարդատերերը հաճախ են մեղադրվում տարբեր հանցագործությունների մեջ՝ սկսած սովորական խուլիգանությունից մինչև հարկերից խուսափում և ֆինանսական բուրգերի ստեղծում,- գրում է NEWSru.com գործակալությունը:
Նման վերջին սկանդալը բռնկվել է միլիարդատեր Ուլիլյամ Կոխի շուրջը (Forbes-ի համաշխարհային վարկանիշային աղյուսակում 276-րդն է՝ 4 մլրդ դոլար կարողությամբ): Նրա դեմ կողոպուտի մեղադրանքով հայց է ներկայացրելOxbow Carbon ընկերության աշխատակիցը: Գործարարի պաշտպանները պնդում են, որ նա անմեղ է, և որ կողոպուտի մասին հայտնած աշխատակիցն ինքը կասկածվում է խարդախությունների մեջ, որն ընկերությանը հասցրել է 40 մլն դոլարի վնաս:
Forbes ամսագիրը հիշատակում է 10 այլ դեպք, երբ վերջին տարիներին միլիարդատերերը դարձել են տարբեր քրեական գործերի մասնակից, որոնց մի մասն ավարտվել է խիստ դատավճռով:
Kingfisher Airlines ավիաընկերության, ինպես նաև F1 Force India խմբի սեփականատեր, հնդիկ միլիարդատեր Վիջայ Մալիան (Forbes-ի վարկանիշային աղյուսակում 1153-րդն է) ձերբակալվել է 2012 թ. հոկտեմբերի 12-ին: Նա մեղադրվում է Հայդարաբադի օդանավակայանում 2 մլն դոլար օդանավակայանի վճարից խուսափելու մեջ: Բացի այդ, Մալիայի դեմ կարող է մեղադրանք ներկայացվել ընկերության աշխատակիցներին աշխատավարձ չվճարելու համար, ինչն արդեն մի քանի գործադուլի տեղիք է տվել: Փորձագետների խոսքերով՝ Kingfisher Airlines ընկերության ֆինանսական վիճակը ողբալի է:
Ֆրանսիացի հայտնի գալերիստ և անտիկվար Գի Վիլդենշտեյնը մեղադրվել է հարկերից խուսափելու մեջ. 2012 թ. փետրվարին դատարանը վճիռ կայացրեց՝ Վիլդենշտեյնին պարտավորեցնելով վճարել 250 մլն եվրո: Հայտնի կոլեկցիոները և միլիարդատերը 2011 թ. գարնանը մեղադրվում էր գողացված ապրանք պահելու մեջ: Վիլդենշտեյնի ինստիտուտի պահեստի խուզարկության ժամանակ հայտնաբերվել էին 20 տարի առաջ գողացված նկարներ:
Բրիտանացի Հանս Քրիստիան Ռաուզինգը 10 մլրդ դոլար կարողությանբ դատարանի առաջ է կանգնել ոչ սթափ վիճակում՝ ալկոհոլի և թմրանյութերի ազդեցության տակ մեքենա վարելու համար: Բացի այդ, նա մեղադրվում է այն բանում, որ կնոջ մարմինը երկու ամիս պահել է տանը, քանի որ իր խոսքերով՝ ոչ մի կերպ չի կարողացել բաժանվել նրանից: Ռաուզինգն իր կարողությունը ժառանգել է պապից՝ Tetra Pak ընկերության հիմնադրից:
Sotheby’s-ի նախկին ղեկավար Ալֆրեդ Թաուբմանը (Forbes-ի վարկանիշային աղյուսակում 491-րդն է) 9 ամիս բանտում է անցկացրել աճուրդների կեղծման համար: Բանտից դուրս գալով՝ մագնատը վերադարձրել է իր կարողությունը (այս պահին՝ 1.5 մլրդ դոլար): Նա 25 առևտրի կենտրոնների սեփականատեր է ԱՄՆ 16 նահանգներում, ինչպես նաև ունի ժամանակակից արվեստի մեծ հավաքածու:
Մեկ այլ ամերիկացի՝ Ռոբերտ Ալան Սթենֆորդը, 110 տարվա ազատազրկման է ենթարկվել ֆինանսական բուրգ ստեղծելու և 7 մլրդ դոլարի խարդախությունների մեղադրանքով:
Galleon հեջ ֆոնդի հիմնադիր Ռաջ Ռաջարաթնամը մեղավոր է ճանաչվել անօրինական ինսայդերական գործարքներից եկամուտ ստանալու մեջ: Հետաքննության տվյալներով՝ 2003-2009 թթ. միլիարդատերն աշխատել է 63.8 մլն դոլար՝ օգտագործելով ներքին կորպորատիվ տվյալները, որոնք ստացել է տարբեր՝ մասնավորապես Google, Intel и Hilton Hotels ընկերություններում իր մարդկանցից:
Հարավկորեական SK Group ընկերության տնօրենների խորհրդի նախագահ Չեյ Տե Վոնը 2003 թ. 7 ամիս բանտում է անցկացել խարդախության մեղադրանքով, ազատ արձակվելուց հետո դարձյալ գլխավորել է ընկերությունը: Նրան ներում է շնորհվել 2008 թ:
Եգիպտոսի խոշորագույն Ezz Steel մետալուրգիական ընկերության սեփականատեր Ահմադ Էզզը մեղավոր է ճանաչվել փողերի լվացման, ինչպես նաև պետական միջոցներն անօրինական կերպով յուրացնելու և անօրինական հարստացման մեջ. նա դատապարտվել է 7 տարվա ազատազրկման:
Marc Rich & Co. ընկերության (ներկայում՝ Glencore) հիմնադիր Մարկ Ռիչը (ԱՄՆ) 1983 թ. ամերիկյան Ֆեմիդայի կողմից մեղադրվել է իրանական նավթի անօրինական առևտրի և հարկերից խուսափելու մեջ, որից հետո թաքնվել է Շվեյցարիայում: ԱՄՆ նախագահ Բիլ Քլինթոնը հրաժարական տալուց առաջ ներում է շնորհել Ռիչին: Սակայն գործարարը շարունակում է ապրել ԱՄՆ սահմաններից դուրս՝ վախենալով վերադառնալ երկիր:
Ռուս գործարար, Ազգային պահուստային բանկի սեփականատեր Ալեքսանդր Լեբեդևը քրեական գործի մասնակից է դարձել 2011 թ. սեպտեմբերի 16-ին «ՆՏՎականներ» ծրագրի ժամանակ ստուդիայում տեղի ունեցած միջադեպից մեկ տարի անց: Այդ ժամանակ նախկին Mirax Group-ի սեփականատեր Սերգեյ Պոլոնսկու հետ քննարկմանը գործարարների միջև ծեծկռտուք էր սկսվել, որը 10 օր անց Ռուսաստանի քննչական կոմիտեն որակեց որպես խուլիգանություն՝ «քաղաքական ատելության դրդապատճառներով հասարակական կարգի կոպիտ խախտմամբ»: Լեբեդևի դեմ առաջ քաշված հոդվածով նրան կարող է սպասվել մինչև 2 տարվա ազատազրկում:
