«ԱՄՆ-ը կգտնի և կպատժի Բենղազիում ԱՄՆ դեսպանին սպանողին»,- հայտարարել է ԱՄՆ ներկայիս նախագահ և նախագահի դեմոկրատ թեկնածու Բարաք Օբաման։ Այս մասին հայտնում է РИА Новости-ն:
Նա ասել է. «Մեր դիվանագետներն աշխատում են ամբողջ աշխարհում, նույնիսկ վտանգավոր կետերում: Ես եմ նրանց ուղարկում, ես ճանաչում եմ նրանց ու նրանց ընտանիքներին: Բենղազիի դեպքից հետո ես հրահանգել եմ հետաքննել տեղի ունեցածն ու այլևս թույլ չտալ, որ նման բան կրկնվի»:
Նախագահի թեկնածուների նախընտրական բանավեճի երկրորդ փուլը տեղի է ունեցել երեքշաբթի երեկոյան Նյու Յորք նահանգի Հեմփսթեդ քաղաքում:
«Ես նախագահն եմ, և ես միշտ պատասխանատու եմ այն ամենի համար, ինչ տեղի է ունենում»,- նշել է նա:
Նա ասել է, որ Բենղազիի դեպքից հետո հրահանգել է ուժեղացնել անվտանգության ապահովումն ԱՄՆ բոլոր դեսպանատներում:
Նրա կարծիքով` դեսպանի սպանությունից հետո Ռոմնիի արտահայտած կարծիքը կառուցողական չէ, և դա չէր կարող ասել քաղաքական գործիչը, որը գլուխ է հանում արտաքին քաղաքական հարցերից: