Ռուսական Regnum լրատվական գործակալությանը տված հարցազրույցի ժամանակ իրանական «Նոր հեռանկարներ» վերլուծական կենտրոնի ղեկավար Միր Ղասեմ Մոումենին անդրադարձել է Ղարաբաղյան հակամարտության կարգավորմանը.
«Ներկայումս Ադրբեջանի ղեկավարությունը մտադիր չէ նոր պատերազմ սկսել Ղարաբաղյան հակամարտության գոտում: Ադրբեջանը պատերազմին պատրաստ չէ ո՛չ քաղաքական, ո՛չ էլ տնտեսական պլանում: Կան մի շարք պատճառներ, որոնք թույլ են տալիս պնդել, որ Բաքուն դեռ չի պատրաստվում սանձազերծել նոր պատերազմ:
Այստեղ խնդիրն այլ է. ադրբեջանական ընդդիմությունն ուղիներ է որոնում իր նպատակներին հասնելու համար, և պաշտոնական Բաքվի ռազմաշունչ հայտարարություններն ուղղված են ընդդիմադիր կողմնորոշում ունեցող քաղաքական ուժերին հակազդելուն: Բացի այդ, գուցե Ադրբեջանն ուժեղ է ռազմական ու տնտեսական պլանում, սակայն նա այսօր ստիպված կլինի պատերազմել «քաղցած ստամոքսով»:
Ադրբեջանի կողմից սպառազինության գնման աճը չի վկայում որևէ բանի մասին, քանի որ թեև Ադրբեջանը գնում է մեծ քանակությամբ զենք, սակայն ո՛չ Ռուսաստանը, ո՛չ Եվրոպան, ո՛չ էլ ԱՄՆ-ը նրան թույլ չեն տա օգտագործել այդ զենքը: Ինչ վերաբերում է Իրանի դիրքորոշմանը, ապա և՛ Հայաստանը, և՛ Ադրբեջանն Իրանի հարևաններն են, և Իրանը նրանց հետ ունի ընդհանուր շահեր:
Իրանում չեն ցանկանում տարածաշրջանում նոր պատերազմ: Ավելին, Թեհրանի համար իդեալական կլիներ Երևանի ու Բաքվի միջև փոխըմբռնման ձեռք բերումը»:
