Երգչուհի Լեյլա Սարիբեկյանը թեև Հանրապետության հրապարակի համերգի ռեժիսորական և կազմակերպչական աշխատանքը բարձր է գնահատում և նշում է, որ «Շարմ» ընկերությունը միակն է, որ որոշակի մակարդակ է ապահովում, և ինքը Երևանի տոնակատարությանը սիրով է մասնակցում, բայց, որ ռուսական շոու-բիզնեսի կատարումները շատ ավելի թույլ էին և որակական առումով զիջում էին մեր երգիչների կատարումներին, դա, ըստ երգչուհու, ակնհայտ էր։
Թե ովքեր են նրանց հրավիրել, Լ. Սարիբեկյանը տեղյակ չէ, և թե ինչպես է ընտրությունը տեղի ունենում, չի կարող ասել, բայց ասում է, որ մեր երգիչները շատ ավելիին են արժանի՝ թե՛ վարձատրության, թե այլ առումներով։ Պարզապես ստացվել է այնպես, որ մեզ մոտ պետք է դրսից գան, որ գնահատվեն, թեև, ըստ երգչուհու, ժողովուրդն իրեն ընդունում է լավ ու ջերմ՝ որպես պրոֆեսիոնալի:
Նրա համար էլ անհասկանալի են եղել ռուսական կատարումները. «Ես չգիտեմ՝ ով է դա անում, բայց ամեն դեպքում մեր հայ հանդիսատեսն արժանի է լավագույններին տեսնելու, դա գուցե ֆինանսների հետ է կապված, բայց ես ամեն դեպքում կուզեի լավագույն ուժերը ներգրավվեին, որովհետև մարդիկ կան, որոնք դուրս են մնում, և ամեն անգամ չէ, որ կարող են մասնակցել։ Բաներ կա, որ պետք է հաշվի առնել. ռաբիսը մի քիչ եթե լիներ պետական համերգներում, ավելի ճիշտ կլիներ»։ Լ. Սարիբեկյանը նաև նշում է, որ ինքը գերադասում է անել ինչ-որ բան, քան քննադատել և պահանջել:
Առաջին շարքերում, ըստ նրա, իրենց շատ լավ ընդունում են, գնահատում, հատկապես առաջին տիկնոջից է Լեյլա Սարիբեկյանը շատ գոհ. նա գործին պրոֆեսիոնալ մոտեցում է ցուցաբերում:
