«Դոլման, թաբուլեն, հարիսան մաքուր հայկական ճաշատեսակներ են»,- այսօր լրագրողների հետ հանդիպմանն ասաց Հայաստանի խոհարարների միության նախագահ Սեդրակ Մամուլյանը:
«Մենք փորձում ենք հնարավորության սահմաններում լուսաբանել և տարածել հայկական ճաշատեսակները, որովհետև երբ ինտերնետն ես բացում, մեր ավանդական ճաշատեսակին բոլորովին ուրիշ երկիր է վերագրված»,- նկատեց նա:
Մամուլյանը նշեց, որ իրենք ամեն տարի փորձում են կազմակերպել և անցկացնել այնպիսի միջոցառումներ, որոնք կգովաբանեն մեր ազգայինը, կլուսաբանեն, հանրությանը կտեղեկացնեն, որ այդ ճաշատեսակներն ունեն դարերից եկած հայկական ծագումնաբանություն. «Օրինակ` Ադրբեջանի նախագահը վերջերս, չգիտես ինչու, անդրադարձել էր դոլմային` նշելով, որ այն չի պատկանում հայկական խոհանոցին: Այդ պատճառով էլ մենք շատ արագ կազմակերպեցինք դոլմայի փառատոնը և այդպիսով աշխարհին ներկայացրինք իրականությունը»:
Հ. Մամուլյանն ասաց նաև, որ արտասահմանյան շատ երկրներից իրենց հետ համագործակցելու բազմաթիվ առաջարկներ են արվում. «Օրինակ` Քաթարում մի գործարար ուզում է բացել ռեստորան միայն հայկական կերակրացանկով: Մեզ հետ պայմանավորվելիս ասաց, որ իրենք ունեն դոլմա, թաբուլե, հարիսա, բայց ցանկանում են ավելացնել կերակրացանկը»:
Մամուլյանի խոսքերով` իրենց նպատակը, սակայն, ոչ թե օտար երկրների հետ համագործակցելն է, այլ մեր երկրում տարածելը, և այդ ուղղությամբ պետք է շատ աշխատել. «Հայաստանում կա «Վրացական» անվանմամբ ռեստորան, որտեղ մատուցվում են միայն հայկական ճաշատեսակներ, ներսում հնչում է հայ աշուղական երաժշտություն: Մենք պետք է գիտակցենք, որ նման կերպ, այսինքն` միայն փող աշխատելու համար չպետք է գովաբանենք, լուսաբանենք օտարինը: Ինչո՞ւ ռեստորանին տալ վրացական անվանում, այլ ոչ` հայկական, որ հետո վրացինե՞րն էլ ասեն` այս ինչ ճաշատեսակը իրե՞նցն է»:
Ամփոփելով` Սեդրակ Մամուլյանը նշեց, որ Հայաստանում այժմ իրենց նախաձեռնությամբ անցկացվում են եռամսյա դասընթացներ, որի շրջանակներում պատրաստում են որակյալ խոհարարներ. «Մենք հրավիրում ենք Հայաստանի տարբեր տարածաշրջաններից խոհարարների, վերապատրաստում և ուղարկում: Օրինակ` «Թուֆենքյան» մեծ համալիրի երկու խոհարարներ մեզ մոտ են վերապատրաստվել»:
Նա տեղեկացրեց նաև, որ իրենք պատրաստվում են հրատարակել եռալեզու (հայերեն, ռուսերեն, անգլերեն) դասագրքեր, որի միջոցով մարդիկ կկարողանան սովորել հայկական հին ավանդական ճաշատեսակների բաղադրատոմսերն ու պատրաստման եղանակները:
