Թուրքիայի հայտարարությունները Ստեփանակերտի օդանավակայանի վերաբերյալ զարմանալի չեն, քանի որ այդ երկիրը Ղարաբաղի հարցում սատարում է պաշտոնական Բաքվի տեսակետներին: «Առաջին լրատվական»-ի հետ զրույցում այս մասին ասաց վաշինգտոնաբնակ ռուս վերլուծաբան Սերգեյ Մարկեդոնովը: Հիշեցնենք, որ Բաքվում կայացած Ադրբեջանի և Թուրքիայի արտգործնախարարների հանդիպման ժամանակ Թուրքիայի արտգործնախարար Ահմեդ Դավութօղլուն հայտարարել է, որ Ստեփանակերտի օդանավակայանի բացման հարցում Թուրքիան կիսում է Ադրբեջանի դիրքորոշումը: Ըստ նրա՝ օդանավակայանի բացման մտադրությունը բացասական քայլ է և կարող է վնասել ղարաբաղյան հակամարտության խաղաղ կարգավորմանը:
Հարցին, թե ի՞նչ դիրքորոշում կարող է այս հարցում որդեգրել Ռուսաստանը, Մարկեդոնովը նշեց, որ Ռուսաստանը դժվար թե անվտանգության երաշխիքներ ստանձնի Ստեփանակերտի օդանավակայանի շահագործման հարցում: Նրա խոսքերով՝ ի տարբերություն Աբխազիայի և Հարավային Օսիայի իրավիճակի, ղարաբաղյան հիմնախնդրում Մոսկվան երբեք ուղիղ չի աշխատել Լեռնային Ղարաբաղի հետ:
«Ռուսաստանը երբեք փաստացի չի սատարել նաև Ղարաբաղի ընտրական գործընթացներին: Այն բանակցային գործընթացը, որին Ռուսաստանը մասնակցում է, չի հադիսանում ուժեղ այլընտրանք, օրինակ, եվրոպական մոտեցումներին, ըստ որոնց նույնպես Ղարաբաղի պետականության դե ֆակտո ամրապնդումը չի հանդիսանում բանալի, որը թույլ կտա լուծել հիմնախնդիրը»,- ասաց Մարկեդոնովը:
Նրա կարծիքով՝ Մոսկվան «բաց կթողնի» Ստեփանակերտի օդանավակայանի հարցը:, հայտարարություններ չի անի կողմերից որևէ մեկի օգտին: Ըստ Մարկեդոնովի՝ դժվար թե որևէ մեկը Մոսկվայում կասի, որ «օդանավակայանը դա վատ է»: Միաժամանակ դժվար թե ռուսական կողմը սատարի ու առաջ տանի օդանավակայանի շահագործման գաղափարը:
