Ադրբեջանական APA լրատվական գործակալության փոխանցմամբ՝Բաքվում տեղի ունեցած Տնտեսական համագործակցության կազմակերպության արտգործնախարարների խորհրդի 20-րդ նիստի շրջանակներում միմյանց են հանդիպել Ադրբեջանի և Թուրքիայի արտգործնախարարներ Էլմար Մամեդյարովը և Ահմեդ Դավութօղլուն:
Հանդիպման ժամանակ կողմերը քննարկել են երկկողմ հարաբերություններն ու տարածաշրջանում առկա իրավիճակը: Լրագրողների հետ զրույցում Դավութօղլուն հայտարարել է, որ Ստեփանակերտի օդանավակայանի բացման հարցում Թուրքիան կիսում է Ադրբեջանի դիրքորոշումը.
«Օդանավակայանի բացման մտադրությունը բացասական քայլ է: Թուրքիան արդեն իսկ դատապարտել է այդ գործողությունը և հայտարարել, որ այդ քայլն անթույլատրելի է: Այդ քայլը կարող է վնասել Ղարաբաղյան հակամարտության խաղաղ կարգավորմանը: Գլխավոր նպատակը պետք է լինի հակամարտության խաղաղ կարգավորումը: Ղարաբաղի հարցում մենք Ադրբեջանի կողքին ենք և աջակցելու ենք նրան»:
