Եթե Թուրքիան Սիրիայի դեմ պատերազմ սկսի՝ չի բացառվում ռուս-պարսկական նոր դաշինքի կնքում. այսօր լրագրողների հետ հանդիպմանը նման կանխատեսումով հանդես եկավ ՌԴ աշխարհաքաղաքական հետազոտությունների ակադեմիայի փոխնախագահ Արայիկ Սարգսյանը: Նա նշեց, որ նոր դաշինքը կենթադրի ադրբեջանա-իրանական կամ ադրբեջանա-ղարաբաղյան սահմանին Ռուսաստանի և Իրանի համատեղ խաղաղապահ ուժերի տեղակայում:
Հարցին ի պատասխան, թե Սիրայում հնարավոր պատերազմն ի՞նչ ազդեցություն կունենա Ադրբեջանի վարքագծի և ղարաբաղյան հիմնախնդրի վրա, բանախոսը նշեց, որ իրականում հայերը շատ են կենտրոնացել Ադրբեջանի վարքագծի վրա, այնինչ այդ երկիրն իրենից ոչինչ չի ներկայացնում: Նա ընդգծեց, որ Ադրբեջանի արտաքին քաղաքականությունը նավթադոլարների վրա է հիմնված:
«Եթե մեկ հայ օլիգարխ կարողանա, կղզիներ և օվկիանոսներ գնելու փոխարեն, գնել SOCAR-ի ակցիաները, որոնք ազատ վաճառվում են Լոնդոնի կամ Հոնկոնգի բորսաներում, Ադրբեջանի արտաքին քաղաքականությունը կզրոյանա: Մի երկիր, որի արտաքին քաղաքականությունը հիմնված է փողի վրա, ապագա չի ունենում: Ադրբեջանն իրենից աշխարհաքաղաքական առումով ոչինչ չի ներկայացնում»,- ընդգծեց Արայիկ Սարգսյանը:
Անդրադառնալով Թուրքիայի Մեջլիսի ընդունած այն որոշմանը, որով այդ երկրը հնարավորություն ունի մեկ տարի ժամկետով անդրսահմանային գոտում ռազմական գործողություններ իրականացնել, բանախոսը նշեց, որ հստակ չէ, թե այդ որոշումը որ երկրի դեմ կարող է ուղղվել: Նա նկատեց, որ, բացի Սիրայից, Թուրքիան ընդհանուր սահմաններ ունի այլ երկրների, մասնավորապես, Հայաստանի, Իրանի, Վրաստանի հետ: Այդ որոշմամբ թուրքական ղեկավարությունը հանգիստ կարող է նաև անդրսահմանային գոտում գործողություններ ծավալել Հայաստանի դեմ: Այն, որ Թուրքիայի Մեջլիսը նման թույլտվություն է տվել, ըստ բանախոսի, փաստում է, որ այդ երկրի ղեկավարության՝ «զրո խնդիր հարևանների հետ» հայտարարությունները սուտ են: Իրականում Թուրքիան ստեղծում է հարյուր կամ հազար խնդիրներ իր հարևան երկրների համար:
Սիրիայի հարցում Ռուսաստանի քաղաքականությունը, ըստ Արայիկ Սարգսյանի, կարող է ձեռնտու լինել սիրահայերին, քանի որ սիրիահայերը նույնպես կողմ են Ասադի իշխանությանը: Նրա խոսքով՝ այս փուլում սիրահայերը պետք է լոկալ պաշտպանություն կազմակերպեն, քանի որ քրիստոնյա տարրի դեմ ուղղված գործողություններ են նկատվում այսօր: Իրաքից, Իրանից, Սիրիայից և այդ տարածաշրջանի այլ երկրներից քրիստոնյաների հեռացման միտում է նկատվում վերջին տարիներին, իսկ թե որ երկիրն է կանգնած դրա հետևում, Արայիկ Սարգսյանը դժվարանում է ասել:
