Երևանի ծննդյան հերթական տարեդարձին նվիրված հանդիսություններն այս տարի բազմազան էին: «Իմ սրտի մայրաքաղաք» խորագիրը կրող միջոցառումները տոնական ուրախ մթնոլորտ ստեղծեցին մայրաքաղաքի բոլոր վարչական շրջաններում:
Հանդիսություններ անցկացվեցին մայրաքաղաքի 26 բեմահարթակներում: Այդ բեմահարթակներից մեկը Կասկադ համալիրում գտնվող Գաֆէսճեան կենտրոնում էր: Այն նախատեսված էր ջազ կատարումների համար: Իրենց ջազային ելույթներով հանդես եկան ջազային խմբեր:
Հիշեցնենք, որ Էրեբունի-Երևանի 2794-ամյակին նվիրված տոնական բուն միջոցառումները մեկնարկել են այսօր «Էրեբունի» արգելոց-թանգարանին հարակից հրապարակում։ ՀՀ նախագահ Սերժ Սարգսյանը, Երևանի քաղաքապետ Տարոն Մարգարյանի ուղեկցությամբ, ԱԺ նախագահ Հովիկ Աբրահամյանի, վարչապետ Տիգրան Սարգսյանի, կառավարության և Երևանի ավագանու անդամների ու հազարավոր երևանցիների և մայրաքաղաքի հյուրերի հետ հետևել է բեմականացված ներկայացմանը: Թատերական ու պարային խմբերի մասնակցությամբ ներկայացվել է մայրաքաղաքի պատմությունը` Էրեբունու հիմնադրման օրվանից մինչ մեր օրերը։ Թատերական բեմականացումն ավարտվել է Էրեբունի-Երևանի օրհներգով։
Տոնական միջոցառումները եզրափակվելու են Հանրապետության հրապարակում` ավանդական դարձած տոնական համերգով և հրավառությամբ:
