Wikileaks-ի հիմնադիր Ջուլիան Ասանժը զրկվել է Anonymous ցանցահենային խմբի աջակցությունից ամերիկացի փոփ-աստղ Լեդի Գագայի՝ Էկվադորի դեսպանատուն այցելելու պատճառով: Այս մասին ասվում է խմբի տարածած հաղորդագրությունում:
Խմբի կարծիքով` Ասանժի հետ կապված ներկայիս իրավիճակը վերածվել է «մեկ դերասանի խաղի»:
«Մենք անհանգստացած ենք այն ուղղությամբ, որով մտադիր է առաջ ընթանալ Wikileaks-ը ապագայում: Վերջին ամսվա ընթացքում ամբողջ ուշադրությունը, որը սևեռված է «արտահոսքի» և ազատ տեղեկատվության պայքարի ուղղությամբ, շրջվել է բացառապես Ասանժի վրա, սակայն Wikileaks–ի էությունը միայն դա չէ»,- ասվում է հաղորդագրության մեջ:
Ցանցահենների համբերության բաժակը լցվել է, երբ Լեդի Գագան այցելել է Ասանժին:
«Նրա համար դա, իհարկե, հիանալի է, սակայն չի համապատասխանում մեր հետաքրքրություններին: Մենք հետաքրքրված ենք փաստաթղթերով և կառավարության տեղեկատվությամբ, որոնք նրանք ցանկանում են թաքցնել հասարակությունից»,- ընդգծել են ցանցահենները:
Հիշեցնենք, որ օգոստոս ամսին դեռևս Ասանժի դաշնակից հանդիսացող Anonymous ցանցահենային խումբը DDoS հարձակման էր ենթարկել Մեծ Բրիտանիայի կառավարական կայքերը:
Ասանժը շարունակում է մնալ Լոնդոնում Էկվադորի դեսպանատանը, որը նրան քաղաքական ապաստան է տրամադրել:
