Ամերիկյան Pizza Hut պիցերիաների ցանցը մրցույթ է հայտարարել այցելուների շրջանում, որի հաղթողը մինչև կյանքի վերջ կարող է անվճար սնվել ցանցի ռեստորաններում: Ինչպես հաղորդում է RBK-ն, մրցույթում հաղթելու համար անհրաժեշտ է նախագահի թեկնածուներ Բարաք Օբամայի և Միթ Ռոմնիի բանավեճի ժամանակ հարց տալ նրանց պիցցայի մասին:
Հարցը հնչում է այսպես. «Պիցցայի համար ի՞նչ լցոն եք նախընտրում»: Թեկնածուներից հարցի պատասխան ստանալու դեպքում՝ հարց տվողը կարող է անվճար սնվել պիցերիայի ռեստորաններում:
Edelman’s Zeno գործակալության առաջարկած գովազդային այս քայլն արդեն քննադատության տեղիք է տվել: Ոմանք կարծում են, որ այդպիսով «թեկնածուների միջև բանավեճը, իսկ դրա հետ նաև ընտրությունները կվերածվեն կրկեսի»: «Չի կարելի հավասարության նշան դնել պիցցայի լցոնի և բժշկական ապահովագրության համակարգի բարեփոխման մասին հարցերի միջև»,- ասել է Օբամայի ընտրարշավի կազմակերպման ներկայացուցիչ Էնդրյու Մաքքարթնին:
Pizza Hut ընկերությունն իր հերթին նշել է, որ հարցումը «կարևոր է ամերիկացիների համար», սակայն ընկերությունում պատրաստակամություն են հայտնել հրաժարվել այդ առաջարկից և հարցումն անցկացնել առցանց: Հաղթողին կընտրի համակարգիչը:
Հիշեցնենք, որ Բարաք Օբամայի և Միթ Ռոմնիի միջև բանավեճը տեղի կունենա 2012թ. հոկտեմբերի 16-ին:
