Այսօր երկարատև հիվանդությունից հետո կյանքի 93-րդ տարում մահացել է Երուսաղեմի Հայոց Պատրիարք Տ. Թորգոմ արքեպիսկոպոս Մանուկյանը:
Երուսաղեմի պատրիարքության միաբան Արիս սրբազանի խոսքերով՝ ուղեղի կաթվածի հետևանքով Թորգոմ սրբազանը վաղուց անկողնային հիվանդ էր, գործելու և շարժվելու՝ անկարող:
Պատրիարքի հուղարկավորության արարողությունը տեղի կունենա հոկտեմբերի 22-ին: Պատրիարքական տեղապահ ընտրելու համար ժողովը կգումարվի հաջորդ ուրբաթ:
«Նախ՝ կընտրվի տեղապահ, հետո կլինեն պատրիարքի ընտրություններ: Պատրիարքական ընտրությունները անմիջապես չեն լինի, քառասուն օր հետո կլինեն», -ասաց նա՝ հավելելով, որ մինչև պատրիարքական ժողովի գումարումը պատրիարքական փոխանորդի իր գործը կշարունակի Տ. Նուրհան արքեպիսկոպոս Մանուկյանը:
Խոսակցություններն այն մասին, որ Թորգոմ պատրիարքին կփոխարինի ԱՄՆ Հայոց Արևելյան թեմի առաջնորդ Տեր Խաժակ արքեպիսկոպոս Պարսամյանը, Արիս սրբազանը վաղ է համարում:
Իսկ արդյոք հավաստի՞ են տեղեկություններն այն մասին, որ Թորգոմ պատրիարքին կփոխարինի Խաժակ սրբազանը, Արիս սրբազանը պատասխանեց. «Խաժակ սրբազանի անվան մասին չխոսենք, որովհետև դա պատրիարքական ժողովի մեջ կորոշվի հետագայում»։
Ավելի վաղ մեզ հետ զրույցում Արիս սրբազանը նշել էր, որ որևէ մեկը, ում 35 տարին լրացած է, սկզբունքորեն թեկնածու է: Նույն այդ կանոնների համաձայն` միաբանական ժողովը նախ իր թեկնածուներին կքվեարկի:
