Ռուսական Regnum լրատվական գործակալության փոխանցմամբ՝ «Ռյայ» մոնիթորինգային կենտրոնը 2012 թվականի սեպտեմբերի 26-30-ը հարցախույզ է անցկացրել 2013 թվականի հոկտեմբերի 16-ին Ադրբեջանում կայանալիք նախագահական ընտրությունների առնչությամբ: Հարցումն անցկացվել է 18-ից բարձր տարիք ունեցող 1500 անձանց շրջանում:
Հարցախույզի արդյունքները վկայել են այն մասին, որ Ադրբեջանի բնակչության մեծամասնությունն աջակցում է նախագահ Իլհամ Ալիևի գործունեությանը: Հարցախույզի արդյունքները վկայել են, որ եթե Ադրբեջանի նախագահական ընտրություններն անցկացվեին առաջիկա կիրակի, ապա հարցման մասնակիցների 87 տոկոսն իր քվեն կտա Ալիևի օգտին, իսկ 13 տոկոսը դեմ կքվեարկի:
Հարցախույզի մասնակիցները պատասխանել են նաև «Արդյոք Իլհամ Ալիևն արտահայտո՞ւմ է ձեր շահերը» հարցին, ինչին 70 տոկոսը դրական (ամբողջովին կամ մասամբ) պատասխան է տվել, 11 տոկոսը՝ բացասական, 6 տոկոսը՝ ավելի շուտ ոչ, քան այո: Հարցման մասնակիցների մոտ 65 տոկոսը երկրի նախագահի պաշտոնում Իլհամ Ալիևին չի տեսնում այլընտրանք:
