«Նոր ժամանակներ» կուսակցության նախագահ Արամ Կարապետյանն «Առաջին լրատվականի» հետ զրույցում Սոչիում Ս.Սարգսյան-Ի.Ալիև-Դ.Մեդվեդև հանդիպումից հետո ստորագրված փաստաթուղթը որակեց հետևյալ կերպ.
«Մարդիկ սկսել են չհասկանալ այդ հանդիպումների իմաստը, քանի որ այդ հանդիպումները որևէ խնդիր չեն լուծում, արդյունքում միայն ընդհանուր հայտարարություններ են ստորագրվում:
Ընդ որում` այս վերջին հայտարարությունը շատ ավելի վատն էր, քան նախկինները: Եթե և՛ Աստրախանում, և՛ նախկինում ընդունված բոլոր հայտարարություններում կա կետ, ըստ որի` միայն խաղաղ ճանապարհով պետք է լուծվի խնդիրը, ապա այս անգամ գրված է, որ կողմերը կձգտեն վիճելի հարցերը լուծել խաղաղ միջոցներով:
Այսինքն` Ադրբեջանը կարողացավ ցանկալի ձևակերպում մտցնել»:
Ըստ Կարապետյանի. «Ադրբեջանական էլիտան իր համար երկու որոշում ունի` հարցը պետք է լուծել կա՛մ ռազմական զարգացման ճանապարհով, կա՛մ ավանտյուրայի զարգացմամբ, որի դեպքում Ադրբեջանն իր համար ինչ-որ դիվիդենտների է սպասում:
Իսկ Սերժ Սարգսյանին այսօր հետաքրքրում է միայն մեկ բան` պահպանել ստատուս քվոն` երկրի ներսում իրավիճակն էլ ավելի չբարդացնելու համար»:
