Այսօր լիբիական ապստամբները պատանդ են վերցրել բրիտանացի 8 հատուկջոկատայինների, որոնք ուղեկցում էին բրիտանացի դիվանագետին` Բենգազիում գտնվող ընդդիմադիր ուժերի հետ հանդիպմանը, ինչպես նաև իր վերադասի այցը կազմկերպելու համար: Այս մասին հաղորդում է BBC-ն:
Մեծ Բրիտանիայի պաշտպանության նախարարությունը այս տեղեկությունը չի մեկնաբանել: Սակայն ինչպես նշվում է նախարարության մամլո ծառայության հայտարարության մեջ` իրենք «հատուկջոկատայինների հետ կապված տեղեկությունները չեն մեկնաբանում, և չեն կարող ո՛չ հերքել, ո՛չ էլ հաստատել»:
Սակայն բրիտանացիների գերեվարման լուրը հաստատել է Human Right Solidarity իրավապաշտպան կազմակերպպությունը, որը նշել է, որ ապստամբները հիմա որոշում են հատուկջոկատայինների` այս կամ այն երկրին պատկանելիության հարցը: Հիշեցնենք, որ երեկ տեղեկություններ էին տարածվել, որ Մեծ Բրիտանիան պատրաստվում է առաջիկ 24 ժամվա ընթացքում հատուկ գործողություններ սկսել Լիբիայում և այդ նպատակով այս երկրի սահմաններին է մոտեցրել հատուկջոկատայինների մի քանի հարյուր ստորաբաժանումներ:
Այսօր առավոտյան Լիբիայի պետական հեռուստատեսությունը կրկին հայտարարել է Ալ-Զաուիյա և Միսրատա քաղաքների հետ գրավման մասին, սակայն այլ աղբյուրներ այս տեղեկությունը դեռ չեն հաստատել: Հիշեցնենք, որ արդեն մի քանի օր է` լիբիական պետական քարոզչությունը անընդհատ հայտարարում է հատկապես Ալ-Զաուիյա քաղաքի գրավման մասին:
