Լատինական Ամերիկայի և Կարիբյան ավազանի երկրների դաշինքը (ALBA) աջակցել է Վենեսուելայի նախագահ Ուգո Չավեսի` Լիբիայում իրավիճակի կարգավորման նախաձեռնությունը: Այս մասին հաղորդում է Associated Press գործակալությունը:
«ALBA-ն աջակցում է Լիբիայում ազգային ճգնաժամը հաղթահարելու համար միջազգային միջնորդական հանձնաժողով ստեղծելու Վենեսուելայի նախաձեռնությունը»,- ասվում է պաշտոնական հայտարարության մեջ, որը ստորագրվել է Դաշինքի անդամ երկրների արտգործնախարարների կողմից:
Հայտարարության մեջ նաև ընդգծվում է, որ հանձնաժողովի ստեղծումը «կօգնի զերծ մնալ Լիբիայում ՆԱՏՕ-ի հնարավոր գործողություններից»:
«Առաջին լրատվականը» տեղեկացրել էր, որ Վենեսուելան առաջարկել է ստեղծել «բարեկամ երկրների բլոկ»` Լիբիայում ծագած հակամարտության կարգավորման համար: Վենեսուելայի արտաքին գործերի նախարար Նիկոլաս Մադուրոյի խոսքերով, հյուսիսաֆրիկյան պետությունում սկսված բռնությունը կանգնեցնելու համար անհրաժեշտ է օգտագործել դիվանագիտությունը, այլ ոչ թե ռազմական սպառնալիքները:
Հիշեցնենք նաև, որ Ուգո Չավեսն առաջարել է այդ հանձնաժողովում ընդգրկել նաև ԱՄՆ նախկին նախագահ Ջիմի Քարտերին, քանի որ վերջինս միջնորդական գործողությունների փորձ ունի:
ԱՄՆ-ն և Ֆրանսիան ավելի վաղ մերժել են Վենեսուելայի նախագահի առաջարկը:
