Ապագան նոր մեդիա միջոցներինն է. համոզված են այս օրերին Աղվերանում եռօրյա դասընթացին մասնակցող լրագրողները, որոնք ժամանել են տարբեր մարզերից` Լոռի, Գեղարքունիք, Սյունիք, Շիրակ:
Դասընթացը կազմակերպել է «Լրագրողներ հանուն ապագայի» ՀԿ-ն` Վրաստանում և Հայաստանում Նիդեռլանդների Թագավորության դեսպանության Սոցիալական փոխակերպումների ծրագրի (Matra) ու ԵԱՀԿ Երևանի գրասենյակի ֆինանսական աջակցությամբ:
Ինչպես են փոխակերպում մեդիաները, ինչպես ստեղծել բլոգ, ինչպես արդյունավետ աշխատել սոցիալական կայքերում, թվային լրագրություն, որն է նոր և ավանդական մեդիաների տարբերությունը. հիմնականում այս թեմաների մասին խոսվեց: Կարևորվեց նաև լրագրողական էթիկան:
Միջազգային փորձագետ Իվան Զասուրսկին ու Արթուր Պապյանը բացի տեսականից, գործնական առաջադրանքներով էլ փորձեցին զարգացնել լրագրողների կարողությունները:
Վանաձորից` «Իններորդ հեռուստաալիք»-ի լրագրող Էդուարդ Արզումանյանը իր բլոգն ունի: «Ճիշտն ասած, մտածում էի, որ նոր մեդիաների մասին շատ բան գիտեմ, բայց այստեղ ինքս ինձ համար պարզեցի, որ ոչինչ համարյա չգիտեմ: Այդ պակասը որոշ չափով լրացվեց»,- ասում է Էդուարդը:
«Նպատակ ունենք այլընտրանքային մեդիա միջոցների առումով զարգացնել լրագրողների գիտելիքները, կարողությունները և հմտությունները, մարզերում ընդլայնել ու կիրառել ժամանակակից տեխնոլոգիաներ, ինչը կնպաստի մարզերում ԶԼՄ-ների գործունեության ակտիվացմանը»,- համոզված է ծրագրի ղեկավար Սուրեն Դեհերյանը:
Նախագծի շրջանակներում կստեղծվի մեկ ընդհանուր էլեկտրոնային ազատ ռեսուրս` մարզային լրագրողների համար: Սա, ինչպես կարծում են կազմակերպիչները, հետագայում մարզային իրադարձություններին վերաբերող նորությունների հարթակ կդառնա:
Նմանատիպ դասընթաց-ճամբար նախատեսված է ապրիլին: Այս անգամ կընդգրկվեն այլ մարզերի ներկայացուցիչներ: Իսկ անցած տարվա հոկտեմբերին կազմակերպված նման դասընթացին մասնակցեցին հանրապետության պետական և ոչ պետական 8 բուհերի լրագրության ֆակուլտետների դասախոսներ:
