«Որևէ կապ չեմ տեսնում խորհրդակցությունների և Արա Տեր-Գրիգորյանի հրաժարականի միջև: Երբ ինքը դիմումը ներկայացնում էր, մենք մանրամասն զրուցել ենք: Նա իր հրաժարականը հիմնավորեց նրանով, որ շուրջ 14 տարի այդ ոլորտում աշխատել է և ցանկանում է փոխել աշխատանքի բնույթը»,- այսօր հայտարարեց առողջապահության նախարար Դերենիկ Դումանյանը՝ պատասխանելով «Առաջին լրատվական»-ի հարցին՝ ինչպե՞ս կարող է Պետական առողջապահական գործակալության ղեկավարի հրաժարականը կապ չունենալ «ատկատների» հետ, երբ բժշկական շրջանակներում խոսում են, որ մինչև նրա հասանելիքը չէին վճարում, պետպատվերի գումարները չէր փոխանցում, իսկ տարբեր կարգերի բուժհաստատությունների ծառայությունների տարբեր սակագների առնչությամբ կոռուպցիոն ռիսկեր չե՞ք տեսնում:
Դումանյանը նշեց, որ Արա Տեր-Գրիգորյանին հարմար աշխատանքի այլ տարբերակ դեռ չունի, սակայն հնարավոր է` որևէ ոլորտում օգտագործեն Տեր-Գրիգորյանի ունակությունները:
Ըստ նրա՝ այն, որ «իբր աշխատել են ատկատներով, իբր դիտմամբ գների տարբերություն է մշակված եղել, որպեսզի շահագրգռվածություն առաջացնեն, հիվանդներին ուղղորդելու տարբերակ առաջացնեն` նման փաստեր չկան»:
«Ես նախարար եմ և իրավունք չունեմ խոսակցությունների մակարդակով որևէ անձի` համակարգում բավականին աշխատանք կատարած, լումա ունեցած մարդու նկատմամբ հետևություններ անելու»,- ասաց Դ.Դումանյանը:
Մեր դիտարկմանը` կարելի է ծառայողական քննություն անցկացնել, նա պատասխանեց. «Ես առողջապահության նախարարն եմ, դա դատախազության գործն է»: Դումանյանի բնորոշմամբ՝ ծառայողական քննությունն այն է, որ երբ բացում են նախկին հաշվետվությունները, և ամեն ինչ նորմալ է, այսինքն` դեպքը բուժվել է, գումարը նոր մտել է հիմնարկ: Դումանյանը պնդեց, որ ՊԱԳ-ի նախկին ղեկավարը չէր որոշում, թե որ հիմնարկին որքան գումար փոխանցի:
Թե ինչո՞ւ Արա Տեր-Գրիգորյանը հրաժարական տվեց հենց Դումանյանի՝ պաշտոնը ստանձնելուց և վարչապետի մոտ ոլորտի վերաբերյալ խորհրդակցությունից հետո, նախարարին նույնպես հետաքրքրեց. «Իրենից ճշտեք, ինձ էլ ասեք, հա՞»:
