Грузия Online-ի փոխանցմամբ՝ «Վրացական երազանք» դաշինքի առաջնորդ Բիձինա Իվանիշվիլին ընդունել է Եվրոպայում ԱՄՆ ռազմածովային ուժերի հրամանատար Ջոն Պակստոնին, նրա տեղակալ Ջեֆրի Հարթմանին և գնդապետ Ջեյմս Օ’Մեարին: Այս մասին նշված է Իվանիշվիլիի Facebook-յան էջում:
Այդ հանդիպմանը ներկա են գտնվել նաև Վրաստանում ԱՄՆ դեսպան Ռիչարդ Նորլանդը և Վրաստանում ԱՄՆ ռազմական կցորդը: Ամերիկացի զինվորականները շնորհավորել են Բիձինա Իվանիշվիլիին՝ խորհրդարանական ընտրություններում տարած հաղթանակի կապակցությամբ: Հանդիպման ժամանակ կողմերը քննարկել են երկու երկրների միջև ռազմական համագործակցության հարցը:
Իվանիշվիլին հայտարարել է, որ ԱՄՆ-ը հատուկ ներդրում է ունեցել Վրաստանի զինված ուժերի ձևավորման և ՆԱՏՕ-ի չափորոշիչներին դրանց համապատասխանելու հարցերում: Նա հավելել է, որ իրենք պետք է անեն այնպես, որ շարունակվի Աֆղանստանում և երկրագնդի այլ թեժ կետերում ՆԱՏՕ-ի հետ Վրաստանի գործընկերությունը:
