Հայաստանի ոստիկանության պետ գեներալ-լեյտենանտ Վլադիմիր Գասպարյանը բազմիցս հայտարարել է, որ չի հանդուրժվելու ոստիկանության այն աշխատակցի քայլերը, ով չի հարգի օրենքը՝ անկախ նրանից բարձրաստիճան սպա է, թե շարքային ոստիկան:
Ոստիկանության թիվ մեկ խնդիրն է նաև, որ առաջին հերթին հենց իրենք հարգեն Հանրապետության նախագահի հրամանները, Ազգային ժողովի կողմից ընդունված օրենքները և կառավարության որոշումները:
Ֆոտոլրագրող Գագիկ Շամշյանը այսօր՝ հոկտեմբերի 4-ին, լուսանկարների մի շարք է արել, թե ինչպես է ՀՀ ոստիկանության Երևան քաղաքի վարչության Քանաքեռ-Զեյթուն վարչական շրջանի ոստիկանության գնդապետ Կարեն Հովհաննիսյանը Թբիլիսյան խճուղում երթևեկում է իր ծառայողական օգտագործման «Տոյոտա» մակնիշի 900 ՈՍ 02 համարանիշի ավտոմեքենայով՝ առանց ամրագոտու: Ի դեպ, առանց ամրագոտու էր նաև նրա վարորդը:
Ըստ shamshyan.com-ի` ոստիկանության լրատվության և քարոզչության վարչության պատասխանատուները բազմաթիվ անգամ հայտարարել են, թե ոստիկանները իրավունք ունեն նման ձևի երթևեկեն: Սակայն, հիշեցնենք Ոստիկանության լրատվության մեր գործընկերներին, որ դա վերաբերում է միայն գունագրաֆիկա ունեցող օպերատիվ ծառայություն իրականացնող տրանսպորտային միջոցի վարորդին և ուղևորին: Իսկ այս պարագայում, Քանաքեռ-Զեյթունի ոստիկանապետի ավտոմեքենան գունագրաֆիկայի ստանդարտներին չի համապատասխանում: Նման օրինախախտման համար օրինախախտում կատարողը ՃՈ աշխատակցի կողմից պետք է ենթարկվի վարչական պատասխանատվության:
