Հայաստանի ազգային հավաքականի ու Դոնեցկի «Շախտյոր»-ի կիսապաշտպան Հենրիկ Մխիթարյանը Чемпионат.сом-ին տված հարցազրույցում խոսել է Չեմպիոնների լիգայի խմբային փուլի երկրորդ տուրի շրջանակներում տեղի ունեցած «Յուվենթուս» – «Շախտյոր» հանդիպման մասին: Հիշեցնենք, որ խաղն ավարտվեց 1:1 հաշվով:
«Արդյունքը կարող էր ավելի լավը լինել մեզ համար: Սակայն, եթե այսպես ավարտվեց խաղը, ուրեմն այսպես էլ պետք է լիներ: Հարկավոր է առաջ շարժվել՝ միևնույն ժամանակ լուծում տալով նախկինում գործած սխալներին, որպեսզի հաջորդ խաղերում կարողանանք ավելի շատ գոլեր խփել և ավելի քիչ բաց թողնել: Ավելի լավ կլինի, եթե ընդհանրապես գոլ չընդունենք: Թուրինում 1:1 խաղացինք, և ոչինչ արդեն փոխել չի լինի: Միգուցե մենք ավելի շատ գոլային պահեր ունեինք: Իհարկե, ցավալի է, որ չկարողացանք օգտագործել մեզ տրված հնարավորությունները:
Իտալական թիմն իսկապես ուժեղ է պաշտպանությունում, հատկապես կենտրոնական գոտում, որտեղ բոլոր երեք ֆուտբոլիստները հավաքականի անդամ են: Մեզ համար իրոք դժվար է: Սակայն, չնայած «Յուվենթուս»-ի այսպիսի պաշտպանություն ունենալուն, մենք բավական գոլային պահեր ստեղծեցինք: Օրինակ՝ երբ խաղավարտին 10 րոպե էր մնացել, այդ ընթացքում «Շախտյոր»-ը 3-4 գոլային պահ ստեղծեց: Միգուցե մեզ համար խոչընդոտ եղավ մեր մեծ ցանկությունը, որն ստիպում էր շտապել»,- ասել է Մխիթարյանը:
