Երևանի միկրոավտոբուսային երթուղիները վերածվում են ավտոբուսային երթուղիների, սական այսօր խնդիրներ կան` կապված ավտոբուսների ներկրման հետ: Այս մասին այսօր լրագրողների հետ հանդիպմանն ասաց Երևանի քաղաքապետարանի տրանսպորտի վարչության պետ Հենրիկ Նավասարդյանը:
Նրա խոսքով՝ անցկացվում են Երևանի նոր երթուղային ցանցի համար անհրաժեշտ մրցույթները: Արդեն ավարտվել են 76 միկրոավտոբուսային երթուղիների մրցույթները, որից 62-ը ճանաչվել են հաղթողներ: Ավտոբուսային երթուղիներից 18-ում են անցկացվել մրցույթներ, որոնցից 12-ը ճանաչվել են հաղթողներ: Ինչպես ասաց Հենրիկ Նավասարդյանը` երթուղային գծերից հանվում են «Ռաֆ» և «ԵրԱզ» մակնիշի և վատ վիճակում գտնվող միկրոավտոբուսները:
Երևանի նոր երթուղային ցանցով Երևանում կմնա 76 միկրոավտոբուսային երթուղի՝ այս տարեսկզբի 109-ի փոխարեն: Մնացածը կամ կվերածվեն ավտոբուսային երթուղիների, կամ կփակվեն:
Տրանսպորտի գերծանրաբեռնվածության հարցը քաղաքապետարանն առայժմ չի կարող լուծել, քանի որ, Հենրիկ Նավասարդյանի խոսքով, ավտոբուսների և միկրոավտոբուսների ներկրման խնդիրներ կան, տնտեսվարողները չեն ցանկանում ներկրում կատարել՝ կապված տրանսպորտային միջոցների թանկացման հետ:
Տրանսպորտի վարչության պետի տեղեկացմամբ՝ չինական ավտոբուսներից 80-ը դեռ չեն շահագործվում՝ վարորդ չլինելու պատճառով: Այս ամսվա ընթացքում նախատեսվում է ևս երեք ավտոբուսային երթուղի բացել Երևանում: Այսօր արդեն կա 35 գործող ավտոբուսային երթուղի:
«Առաջին լրատվական»-ի հարցին` ո՞վ պետք է վերահսկողություն սահմանի, որպեսզի, օրինակ, ավտոբուսների վարորդների համար գծատերերը բարձր՝ օրական 30 հազար դրամ «պլան» չսահմանեն, Հենրիկ Նավասարդյանը պատասխանեց. «Ավտոբուսային երթուղու տնտեսվարողն օրական 22-24 հազար դրամ միայն վառելիքի գումար է տալիս: Դա նորմալ է` որպեսզի վնասով չաշխատի: Օրական 500-600 ուղևոր պետք է տեղափոխվի` վնասով չաշխատելու համար: Բացի այդ` յուրաքանչյուր ավտոբուսի համար օրը 8 հազար դրամ պետք է ստանա` իր գումարը հանելու համար, պետք է կարողանա նաև վերցրած վարկը փակել»:
Միկրոավտոբուսների վարորդների համար սահմանված «պլանի» չափը նույնպես, ըստ վարչության պետի, նորմալ է, քանի որ «Գազել» մակնիշի միկրոավտոբուսների գները թանկացել են, տնտեսվարողների ծախսերը` ավելացել:
