ԱԺ բրիֆինգների ժամանակ ՕԵԿ պատգամավոր Հովհաննես Մարգարյանը ամփոփեց ԱԺ քառօրյան՝ մասնավորապես անդրադառնալով վրացական պետհամարանիշների խնդրի հետ կապված կառավարության առաջարկած օրենքի փոփոխություններին, որով վարորդներին վեցամսյա վարկ է տրամադրվում մաքսային վճարները մուծելու համար,մարդատար ավտոբուսների խնդրին դեպի Եվրոպա, մասնավորապես Թուրքիա, երբ դիվանագիտական հարաբերություններ չունենալու պատճառով դժվարանում է վարորդների աշխատանքը:
Հովհ. Մարգարյանը անդրադարձավ նաև 2-րդ ընթերցմամբ Հողային օրենսգրքի փոփոխություններին, ինչի արդյունքում գյուղացիներին հնարավորություն է տրվում մինչև 1200 քառակուսի մետր ունեցող հողային տարածքում, առանց այլևայլ վճարների, կառուցապատում իրականացնել և մինչև 5000 քառակուսի մետր տարածքում նույնպես կառուցապատում իրականացնել` ձկնաբուծությամբ զբաղվելու նպատակով: Նա անդրադարձավ նաև գազի սակագնի չթանկացման շուրջ երկու նախագահների համաձայնությանը և հույս հայտնեց, որ սոցիալական փաթեթից առաջին հերթին կօգտվի աղետի գոտին:
Ինչ վերաբերվում է «Ժառանգության» միջադեպին, նա ասաց, որ իր կարծիքը կհայտնի ծառայողական քննության ավարտից հետո, իսկ ՀԱԿ-ի պահանջների վերաբերյալ նկատեց, որ իշխանությունները դրանք քննարկման կդնեն, եթե պահանջները որպես առաջարկներ ներկայացվեն, այլ ոչ թե ուլտիմատում։ Ավելին, ՕԵԿ ներկայացուցիչը ասաց, որ իրենց կուսակցությունը քննարկել է Լևոն Տեր-Պետրոսյանի պահանջները, մասնավորապես՝ սոցիալ-տնտեսական վիճակին վերաբերյալ, որը արմատական բարեփոխումների կարիք է զգում: