«Ղարաբաղյան սառեցված հակամարտությունը մոտենում է հալվելու ջերմաստիճանին: Այսօր Հայաստանի և Ադրբեջանի միջև հակամարտությունը վերսկելու նշաններ կան: Ոչ ոք չի կարող կանխատեսել նոր պատերազմի ելքը, բայց այն սկզբունքորեն կարող է տարբերվել առաջին պատերազմից և ավելի ավերիչ կլինի»: Այս մասին, ինչպես հաղորդել է BBC-ի ադրբեջանական ծառայությանն ասել է Ռազմաօդային ուժերի ադրբեջանական ծառայության նախկին ամերիկացի դիվանագետ, արտաքին քաղաքականության ամերիկյան խորհրդի գիտաշխատող Ուեյն Մերրին:
«Ո՛չ ԱՄՆ-ը, ո՛չ Ռուսաստանը բացահայտորեն չեն սատարի ո՛չ մեկ, և ո՛չ էլ մյուս կողմին, չնայած Ռուսաստանը, պայմանագրային պարտավորություններ ունի Հայաստանի հետ: Նրանք քաղաքական միջոցներով կհասնեն հակամարտության ավարտին, սակայն միայն Ռուսաստանն ունի Երևանի կամ Բաքվի վրա ուղիղ ճնշում գործադրելու պոտենցիալ: Ռուսաստանին ձեռնտու է ներկայիս ստատուս-քվոն, քանի որ այլ իրավիճակում նա ստիպված կլինի ընտրություն կատարել Հայաստանի և Ադրբեջանի միջև»,- նշել է Մերրին:
Դիվանագետի խոսքերով՝ Լեռնային Ղարաբաղի հակամարտությունը խաղաղ ճանապարհով լուծելն այժմ ավելի դժվար է, քան 10 տարի առաջ էր:
«Երկու կողմերն ակտիվորեն զինվում են, կորսվել է խաղաղ կարգավորման հույսը, ժողովուրդների միջև գերիշխում է ատելությունը: Ցանկացած պահի իրավիճակը կարող է վերահսկողությունից դուրս գալ: Եվ այդ ժամանակ ո՛չ ԱՄՆ, ո՛չ Ֆրանսիան և ո՛չ էլ ԵՄ-ն չեն կարողանա կանգնեցնել: Շատերը կարծում են, որ Ղարաբաղյան հակամարտության լուծման բանալին գտնվում է Կրեմլում, սակայն Մոսկվան այժմ զգուշանում է տարածաշրջանում Թուրքիայի դերի մեծացմամբ և միակ ուժի վերածվելուց, որն ընդունակ է թուլացնել լարված մթնոլորտը: Իսկ ԵԱՀԿ Մինսկի խումբն անզոր է ստեղծված իրադրության դեմ»,- ընդգծել է նա:
Իր հերթին Կարնեգի հիմնադրամի Կովկասի հարցերով փորձագետ Թոմաս դե Վալը նշում է, որ Ղարաբաղյան հակամարտությունը սառեցված հակամարտություն չէ:
«Այսպիսի հռետորաբանությունը պատերազմն ավելի հնարավոր է դարձնում, և վտանգն այն է, որ ինչ- որ պահի խոսքերը կարող են վերածվել կոնկերտ գործողությունների”,-ընդգծել է փորձագետը:
Խոսելով հակամարտության կարգավորման հարցում Ռուսաստանի դերի մասին, փորձագետը նշել է, որ Կրեմլը կորցրել է`որպես չեզոք միջնորդի իր վստահությունը Բաքվի և Երևանի մոտ:
«Ի տարբերություն Մեդվեդևի, Պուտինը բավական սառը վերաբերմունք ունի Ղարաբաղյան հակամարտության նկատմամբ»,- նշել է փորձագետը՝ ուշադրություն հրավիրելով Կրեմլի արձագանքի վրա`կապված ադրբեջանցի սպա Ռամիլ Սաֆարովի արտահանձնման հետ:
«Ի տարբերություն Սպիտակ Տան՝ Կրեմլում այդ առնչությամբ արտահայտվեցին երեքօրյա դադարից հետո, ինչը հստակ մեսիջ է Երևանին»,- եզրափակել է նա:
